Qasym-Jomart Toqaev rásim kezinde syilyq laýreattary men grant ielerin, alǵys jariialanǵan shyǵarmashylyq ujymdardy jáne barlyq jýrnalister qaýymyn kele jatqan kásibi merekelerimen quttyqtady.
– Buqaralyq aqparat quraldary – jańalyqtyń jarshysy. El ishindegi jáne álemdegi oqiǵalardan halyqqa shuǵyl ári shynaiy aqparat taratý – Sizderdiń kásibi eńbekterińiz. Sondyqtan, Sizderdiń qoǵamdyq mańyzy zor qyzmetterińizge biz árqashan qurmetpen qaraimyz, baǵalaimyz. Meniń tapsyrmam boiynsha Úkimet arnaiy qaýlymen Qazaqstan jýrnalisteriniń kásibi merekesin bekitti, – dedi Prezident.
Qasym-Jomart Toqaev ozyq tehnologiia zamanynda media salasynyń múmkindikteri óte aýqymdy ekenin atap ótti. Memleket basshysy jýrnalistikanyń jańa dáýirinde ǵalamtor jelisi men áleýmettik jelilerdiń airyqsha róline toqtalyp, aqparattyń ashyq, jedel jáne qoljetimdi bolýy jetistiktiń basty ólshemderine ainalǵanyn aitty.
– Memlekettiń áleýetin nyǵaitý, ekonomikany damytý, azamattardyń turmys sapasyn arttyrý – búginde elimizdiń aldynda turǵan mańyzdy mindetter. Otandyq media-qaýymdastyqtyń syndarly negizde uiysýy, jýrnalisterdiń belsendi azamattyq ustanymy, olardyń kásibi deńgeii jáne ádildigi – aqparattyq keńistiktegi tabysty jumystyń negizgi sharttary. Memleket óz tarapynan BAQ-qa qoldaý kórsete beredi, – dep atap ótti Prezident.
«Jas Órken» JShS bas direktory Júsipbek Qorǵasbekke, «Komsomolskaia Pravda – Qazaqstan» gazetiniń bas redaktory – Viktor Kiianitsaǵa, «Ana tili» gazetiniń bas redaktory – Janarbek Áshimjanǵa, «Astana» telearnasynyń redaktory – Jaina Jaqsylyqovaǵa Memleket basshysynyń Ókimimen syilyq taǵaiyndaldy.
Granttar «Habar 24» telearnasynyń tilshisi – Raýan Myńbaevqa, «Qazaqstan» teleanasyndaǵy «Másele» taldamalyq baǵdarlamasynyń júrgizýshisi Nartai Sársenǵalievke, «Qazaqstan» teleradiokorporatsiiasy Mańǵystaý oblystyq filialynyń shef-redaktory Asem Sartbaevaǵa tapsyryldy.
«Egemen Qazaqstan», «Ekspress K», «Znamia trýda» jáne «Shalqar» radiosy shyǵarmashylyq ujymdaryna Qazaqstan Respýblikasy Prezidentiniń alǵysy jariialandy.
Qasym-Jomart Toqaevtyń Alǵys hattaryn «Aiqyn» gazetiniń bas redaktory Nurtóre Júsip, «Habar» telearnasy taldamalyq baǵdarlamalar bóliminiń shef-redaktory Aleksandr Trýhachev, «Qazaqstan» telearnasynyń júrgizýshileri Qymbat Dosjan jáne Dana Nurjigit, «Habar 24» telearnasynyń shef-redaktory Shalqar Qojaev, «Qazaqstan» telearnasynyń aqparattyq-saraptamalyq baǵdarlamalar direktsiiasynyń direktory Erlan Atambai, «Liter» gazeti bas redaktorynyń orynbasary Janna Oishybaeva, «KTK» telearnasynyń bas direktory Elmira Djamilova, sondai-aq «Qazaqparat» HAA jáne «Jetisý» telearnasy aldy.
Qazaqstan-Resei jáne Qazaqstan-Qytai yntymaqtastyǵyn nyǵaitýǵa belsendi atsalysqany úshin Búkilreseilik memlekettik televiziia jáne radio habarlaryn taratý kompaniiasy men «CCTV» Halyqaralyq telearnasy Qazaqstan Prezidentiniń Alǵys hattarymen marapattaldy.
Memleket basshysynyń atynan elimizdiń barlyq óńirlerine jiberilgen alǵys hattar úzdik jýrnalisterge saltanatty túrde tabys etiletin bolady.
Sondai-aq, búgingi jiynda Qasym-Jomart Toqaev Arystaǵy oqiǵany jurtqa jedel jetkizgen jýrnalisterge alǵys aitty.
"Eki kún buryn ǵana Arys qalasynda bolǵan tótenshe oqiǵalar jóninde elimizdiń túpkir-túpkirine der kezine habar tarattyńyzdar. Bul árine barsha halyqtyń janyna batqan oqiǵa boldy", - dep atap ótti Memleket basshysy.
Qazaqstan Prezidenti osyndai jaýapty sátte otandyq BAQ ókilderi búkil Qazaqstan jurtshylyǵyna Arystaǵy oqiǵa týraly jedel ári naqty aqparat taratqandyǵyn atap ótti.
"Barlyq jýrnalisterge alǵysymdy, rizashylyǵymdy bildiremin", - dedi Q.Toqaev.
