Búginnen bastap Májilis zań shyǵarý qyzmetin úzdik nasihattaǵan jýrnalisterge arnalǵan «Parlament sózi» syilyǵyna úmitkerlerden ótinim qabyldaýdy bastaidy, dep habarlaidy "Ult aqparat".
Májilis baspasóz qyzmetiniń málimetinshe, elimizde oryn alǵan karantin rejimi Májilis depýtattarynyń jumys nysanyn ózgertkenimen, onyń mazmunyna áser etken joq. Osy turǵyda mańyzdy zań jobalaryn talqylaý, halyqty tolǵandyratyn máseleler boiynsha ázirlengen depýtattyq saýaldar burynǵydai júieli túrde jýrnalisterge usynylýda.
Sondyqtan biyl da BAQ qyzmetkerleri kúni qarsańynda Májilis «Parlament sózi» syilyǵynyń jeńimpazdaryn anyqtaityn bolady.
Arnaiy parlamenttik syilyq 2016 jyly Palata Spikeri Nurlan Nyǵmatýlinniń tóraǵalyq etýimen Májilis Biýrosynyń sheshimi boiynsha taǵaiyndalǵan.
Ataýly syilyqqa palatanyń zań shyǵarýshylyq qyzmeti jaiynda 2019 jyldyń 3 qyrkúiegi men 2020 jyldyń 15 maýsymy aralyǵynda jazylǵan jáne jaryq kórgen materialdar qabyldanady.
Jeńimpazdar Májilistiń qyzmeti týraly úzdik televiziialyq, merzimdik baspasóz, ǵalamtor men radiomaterialdar, sonymen birge, foto jáne beinematerialdar boiynsha anyqtalady.
Sondai-aq, Qazaqstan parlamenttik jýrnalistikasynyń damýy men órkendeýine úles qosqandar da eskeriledi.
Ótinimder 2020 jyldyń 22 maýsymyna deiin qabyldanady.
Qosymsha aqparatty Májilistiń www.parlam.kz resmi saitynan alýǵa bolady.
