Tasqyn sýdan zardap shekken Maqtaaral aýdanynyń turǵyndaryna kómek berý isinen Túrkistan oblysy men Shymkent qalasyndaǵy jýrnalister qaýymy da shet qalǵan joq, - dep habarlaidy oblys ákiminiń baspasóz qyzmeti.
Bir top BAQ ókili eń aldymen Maqtaaral aýdany Izgilik aýyly T.Áýbákirov atyndaǵy orta mektebinde ornalasqan Jańaturmys aýylynyń turǵyndarymen kezdesip, olardyń qazirgi tynys-tirshiligimen tanysty. Munda qazir tasqyn sýdan zardap shekken 207 adam ornalastyrylǵan.
«Úsh mezgil tamaq beriledi. Arnaiy meditsina mamandary tekserý júrgizip, densaýlyǵymyzǵa kútim jasaýda. Azyq-túlik, kiim-keshekten esh tapshylyq joq» deidi jańaturmystyqtar.
Jýrnalister qaýymy osyndaǵy 207 adamnyń túske asyn ázirleý úshin bir qoidy qurban shalyp, sondaǵy aqsaqaldardyń batasyn aldy.
Munan soń tilshiler toby Atakent kentindegi Q.Sátbaev atyndaǵy orta mektepke arnaiy baryp, ondaǵy oqýshylarǵa sý jańa plazmalyq teledidar tartý etti. Sondai-aq, olar oblystyq shtab qoimasynyń jumysymen tanysyp, tolassyz kelip jatqan gýmanitarlyq júk kerýeniniń jetekshilerimen tildesti.
Tilshiler nazarynan Túrkistan oblystyq «Jastar resýrstyq ortalyǵy» KMM eriktiler klýbynyń jumysy da tys qalǵan joq. Shtab jinalysyna qatysqan Túrkistan oblystyq jýrnalister odaǵynyń tóraǵasy Ǵalymjan Elshibai erikti jastardyń jumysyna sáttilik tilep, úii sý astynda qalǵan áriptesimiz, Maqtaaral aýdany ákiminiń baspasóz hatshysy Dinmuhamed Aiazbekovke odaq músheleri atynan kómek retinde 300 myń teńge tabys etti. Ol sondai-aq tasqyn sýdan zardap shekken Maqtaaral halqyna QR Jýrnalister odaǵynyń tóraǵasy Seitqazy Mataev pen «Egemen Qazaqstan gazeti» AQ prezidenti Darhan Qydyráliniń ystyq yqylasy men sálemdemesin jetkizdi.
Jýrnalist qaýym munan soń Myrzakent kentinde turatyn Ekinshi dúniejúzilik soǵystyń ardageri 96 jastaǵy Saitmurat Kúzjanovtyń shańyraǵynda bolyp, maidangerge merekelik syi-siiapatyn tabys etti. Sonymen qatar, olar Maqtaaral aýdanynyń ákimi Baqyt Asanovtyń qabyldaýynda bolyp, tasqyn sý zardabyn joiý, turǵyn úi qurylys jumystaryn júrgizý, shyǵyn tólemderiniń qalai júzege asatyny týraly pikir almasty.
Óz kezeginde sóz alǵan aýdan basshysy qiyn-qystaý kezeńde maqtaaraldyqtarǵa qol ushyn sozǵan jornalshy qaýymǵa alǵys bildirdi.
