Búgin Aqordada Memlekettik hatshy Gúlshara Ábdiqalyqova úzdik jýrnalisterge Prezident syilyǵy men granttaryn tabystady. Saltanatty jiynda «Habar» arnasynyń tilshisi Maira Ábdirahmanova prezident syilyǵynan alatyn qarjysyn qaiyrymdylyq qoryna aýdaratyndyǵyn aitty, dep habarlaidy "Ult aqparat".
«Men úshin Prezident syilyǵyn alý úlken baqyt. Birinshiden Memleket basshysy Nursultan Ábishuly Nazarbaevqa, ári «Habar» agenttigi men «24 KZ» ujymyna, QR Prezidentiniń baspasóz qyzmetine jáne kandidattardy iriktep alǵan bedeldi komissiia múshelerine alǵysymdy bildiremin. Bul – ujymnyń jetistigi. Men televidenieniń tabaldyryǵyn osydan 30 jyl buryn attadym», - dedi ol.
Osy rette tájiribeli jýrnalist alǵan syilyǵyn «Meiirimdilik» qaiyrymdylyq qoryna aýdaratyndyǵyn jetkizdi.
«Ózderińiz biletindei, bul qordy áriptesim, jýrnalist Arýjan Sain basqarady. Elbasy óziniń «Jibek joly» beibitshilik syilyǵynan alǵan qarjysyn osy qorǵa aýdarǵan bolatyn. Nátijesinde 29 bala ólim aýzynan qutqaryldy. Olarǵa shuǵyl túrde operatsiia jasaldy. Meniń oiymsha, balalarǵa áli de kómek kerek. Sondyqtan biz Memleket basshysy Nursultan Nazarbaevtan úlgi alýymyz kerek», - dep túiindedi sózin Maira Ábdirahmanova.
