Tótenshe jaǵdaiǵa bailanysty óz jumysyn toqtatýǵa májbúr bolǵan mekemeler eń tómengi jalaqydan kem bolmaityn eńbekaqy tóleýi tiis, dep habarlaidy QazAqparat.
Bul týraly QR Eńbek jáne halyqty áleýmettik qorǵaý ministri Birjan Nurymbetov Ortalyq kommýnikatsiialar qyzmetindegi brifingte aitty.
«Tótenshe jaǵdaiǵa bailanysty óz jumysyn toqtatýǵa májbúr bolǵan mekemelerge Eńbek Kodeksiniń 112-baby taraityn bolady. Bul – májbúrli jumys toqtatý dep atalady. Bul jerde jumys berýshi tarapynan jumysshylarǵa keminde elimizde bekitilgen eń tómengi jalaqydan kem emes kólemde eńbekaqy tólenýi tiis», - dedi ministr Ortalyq kommýnikatsiialar qyzmetinde ótken brifingte.
Onyń aitýynsha, bizdiń elimizdegi eń tómengi jalaqy mólsheri – 42500 teńge.
«Biraq, eger de, Eńbek shartynda nemese Ujymdyq shartta osyndai májbúrli toqtatý jaǵdaiyna tómengi jalaqydan joǵary jalaqy qarastyrylǵan bolsa, onda joǵary jalaqy tólenedi. Bul shekti soma eń tómengi jalaqy mólsherinen kem bolmaýy tiis», - dedi B. Nurymbetov.
Buǵan deiin ministr qashyqtyqtan jumys isteý múmkindigi bar barlyq kásiporyndar men mekemeler osy rejimge aýysýǵa mindetti ekenin málimdegen edi.
Sondai-aq, jumys kólemi shekteletin bolsa, jumys berýshiler ózderiniń buiryǵymen qysqartylǵan jumys rejimine kóshýge quqyly.
Eske sala ketsek, QR Prezidentiniń Jarlyǵymen Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty QR barlyq aýmaǵynda 2020 jylǵy 16 naýryz 08 saǵat 00 minýt pen 2020 jylǵy 15 sáýir 07 saǵat 00 minýt aralyǵynda tótenshe jaǵdai engizildi.
Sondai-aq, Qazaqstan azamattaryna 15 sáýirge deiin el aýmaǵynan shyǵýǵa tyiym salyndy.
QR Prezidenti Qasym-Jomart Toqaev el halqyna úndeý joldady. Joldaýdyń tolyq mátini arnaiy jariialandy.
