Tanymal prodiýser Jan Muqanov "Irina Kairatovna" tobynyń múshesi men ánshi Shiza-ny Almatydaǵy kontserttegi beiádep qylyǵy úshin birjolǵa keshirýdi surady, - dep habarlaidy Tengrinews.kz.
Onyń sózinshe, IK múshesi resmi túrde keshirim surady, tipti mas bolǵanyn moiyndady. "Al mundaidy kóbi aita bermeidi". Bul týraly prodiýser Instagram-da jazdy.
Jan Muqanov IK árdaiym batyl jigitter qatarynan bolǵanyn aitty. Ol topty aiyptap jatqan jeli qoldanýshylaryna "bári jas bolǵanyn, jas kezde adam kóp qatelik jiberetinin jáne bul adamdardy kinálaýǵa sebep emes" ekenin aitty.
"20 jyldyq jumysymda ártisterdiń 90 paiyzyn mas, beiádep sózder aitqan, adekvat emes kúide kórdim. Jumys kúnderi taqýanyń maskasyn kiip, demalysta bardan shyqpaityndar az emes", - deidi prodiýser.
Jan Muqanov IK tobyn tájiribeli, óte tanymal jáne keremet ártister, al Shiza-ny niýsmeiker dei kele olardy keshirip, ári qarai júreiik dedi.
"Al mundai jaǵdai ekinshi ret qaitalansa, men múmkindigim jetkenshe barlyq ártisti barlyq alańnan alyp tastaimyn", - dedi ol.
Onyń sózinshe, jigitter keshirim surap, qoǵamdyq jazaǵa tartylýy kerek. Prodiýser osy kontsertten túsken aqshany qaiyrymdylyqqa jumsaýdy usyndy, alaida olar onsyz da muqtaj adamdarǵa az kómektespeitinin aitty.
"Meniń alańdaitynym, bizdiń mýzyka indýstriiasy naryǵy onsyz da quldyrady, kóbisi ketip qaldy, basqa elderde turady. Bul balalar barlyq qiyndyqqa qaramastan mýzyka jasap, úiinde ósip keledi. Kópjyldyq eńbekti bir aqymaqtyqpen joqqa shyǵaryp almaiyq", - dep sózin qorytyndylady Jan Muqanov.
Eske salaiyq, buǵan deiin "Irina Kairatovna" tobynyń músheleri jáne Shiza laqap atymen tanymal reper Ashat Jolshiev synǵa qalǵan edi. 25 mamyrda Almatydaǵy Balýan Sholaq atyndaǵy sport saraiynda "Irina Kairatovna" men Shiza-nyń kontserti ótken. Jeli qoldanýshylary "Irina Kairatovna" tobynyń múshesi Azamat Marklenov pen Ashat Jolshievtiń sahnadaǵy áreketin synady. Ánshiler sahnada boǵaýyz sóz de aitady. Al ánshi Ashat Jolshiev Qazaqstannyń týyn adamdarǵa laqtyryp jibergen.
