Qazaqstanda jeke jumyspen qamtý ortalyqtary jumyssyzdardy jumysqa ornalastyrǵany úshin aqsha ala alady, dep habarlaidy QR Eńbek jáne halyqty áleýmettik qorǵaý ministrliginiń baspasóz qyzmeti.
«Memleket bir jumyssyzdy jumysqa ornalastyrý úshin jumyspen qamtý salasynda aýtsorsingtik qyzmet kórsetetin jeke kompaniialarǵa 52 myń teńgege deiin tóleýge daiyn. Jeke jumyspen qamtý agenttikteri 2018 jyldan bastap memlekettik halyqty jumyspen qamtý ortalyqtarynda tirkelgen jumyssyzdarǵa jumys izdeý jáne jumyspen qamtý qyzmetterin usynyp keledi.
Bul qyzmetterdi joǵary (nemese joǵary oqý ornynan keiingi) nemese tehnikalyq jáne kásiptik bilimi bar jáne jumyspen qamtý jáne (nemese) kadrlarmen qamtamasyz etý salasynda qyzmet kórsetýde keminde 1 jyldyq tájiribesi bar jumyskerleri bar zańdy tulǵalar da, jeke tulǵalar da usyna alady», - delingen habarlamada.
Aýtsorsing qyzmetterin usyný úshin elektrondy eńbek birjasyndaǵy (www.enbek.kz) jeke kabinet arqyly jumyspen qamtý ortalyǵy ornalastyrǵan lotty tańdap, biliktilik talaptaryna sáikestigin rastaityn qujattardy tirkeý qajet. Eger bári durys bolsa, jumyspen qamtý ortalyǵy men lotty tańdaǵan jeke agenttik arasynda aýtsorsing týraly kelisim jasalady. Jeke jumyspen qamtý agenttigi kelisimge qol qoiǵan sátten bastap jumysqa ornalastyrý úshin jumyssyzdardyń tizimi beriledi. Qyzmetterge aqy tóleý kezinde kelisimshart somasynyń 20% aldyn-ala tóleý qarastyrylǵan.
«Jeke agenttik 30 jumys kúni ishinde jumys izdeidi. Jumyspen qamtý agenttikteri arqyly ornalasqandar bir jumys ornynda (bir jumys berýshimen) 6 ai boiy úzdiksiz jumys isteýi kerek. Bul fakt qyzmetkerge mindetti zeinetaqy jarnalaryn aýdarý arqyly rastalady», - dedi Eńbek resýrstaryn damytý ortalyǵynyń (budan ári ERDO) jumyspen qamtý qyzmetin damytý departamentiniń direktory Irina Rýbashina.
Onyń pikirinshe, jumyspen qamtý salasyndaǵy aýtsorsing qyzmetter jańa biznesti ashqysy keletinder úshin jaqsy múmkindik bolýy múmkin, óitkeni is júzinde eshqandai qarjylyq salymdardy qajet etpeidi.
«Memleket jumyssyzdardyń jumysqa ornalasýyna jáne jumys ornynda úsh jáne alty aidan keiin jumys istegen ýaqytyna aqy tóleýge kepildik beredi. Tariftiń mólsheri 35 000-nan 52 500 teńgege deiin jáne jumyssyzdarǵa jumys tabýdyń qiyndyǵyna jáne jumyspen qamtý ortalyǵynda - qalada nemese aýyldyq jerde tirkelýine bailanysty. Jeke agenttik aýmaqtyq turǵydan táýelsiz, demek, birneshe aimaqtarda jáne birneshe aýtsorsing kelisimderi boiynsha qyzmet kórsete alady», - dedi Rýbashina.
Aýtsorsing týraly kelisim elektrondyq formatta jasalady. Halyqty jumyspen qamtý ortalyqtary jeke jumyspen qamtý agenttikterine jan-jaqty konsýltatsiialyq qoldaý kórsetedi jáne jumysqa ornalastyrý úshin qajet jumyssyzdar týraly tolyq aqparatty usynady.
Aýtsorsing máseleleri boiynsha jaqyn jerde ornalasqan halyqty jumyspen qamtý ortalyǵyna nemese ERDO-ǵa 8-7172-954317 telefony arqyly (ishki nómir 392 jáne 384) nemese d.toktarov@enbek.kz, k.galym@enbek.kz e-mail arqyly habarlasýǵa bolady.
