1 shildeden bastap bazalyq zeinetaqy jańa tártip boiynsha tólenedi. Oǵan sáikes, eńbek ótili 10 jylǵa jetpeitin zeinetkerler bazalyq zeinetaqynyń eń tómengi mólsherin - 15 274 teńgeni ala beredi. Al 33 jyldyq ótili bar adamdar odan eki ese artyq alady, dep xabarlaidy QazAqparat tilshisi.
QR Eńbek jáne xalyqtyq áleýmettik qorǵaý vitse-ministri Svetlana Jaqypovanyń aitýynsha, belgili bir sebeptermen jinaqtaýshy zeinetaqy júiesine qatysa almaǵan keibir azamattarǵa jeńildik jasalady.
«Birinshiden, bala kútimimen úsh jyl júrip qalǵandarǵa atalǵan ýaqyt eńbek ótili dep jazylady. Biraq ol ýaqyt 12 jyldan aspaýy tiis. Sol siiaqty I jáne II toptaǵy múgedekterge, sondai-aq, 80 jastan asqan adamdarǵa kútip jasaǵandarǵa da eńbek ótili jazylady. Sosyn áskeri adam qyzmet babyna bailanysty basqa bir jerge jiberilse, al ol jerde onyń jubaiyna jumys tabylmasa, onyń da ótkizgen ýaqyty eńbek ótiline jatqyzylady. Diplomattardyń jubailaryna da týra sondai jeńildik jasalady», - dedi S.Jaqypova Úkimet úiinde ótken baspasóz máslixatynda.
Aita keteiik, kelesi aidan bastap bazalyq zeinetaqyny taǵaiyndaý tártibi ózgeredi. Memlekettik biýdjetten tólenetin bazalyq zeinetaqynyń mólsheri eńbek ótili men zeinetaqy júiesine qatysý merzimine táýeldi bolady. Búginde bazalyq zeinetaqy barlyǵyna birdei tólenip otyr. Al onyń mólsheri eń tómengi kúnkóris deńgeiiniń 54 protsentin quraidy. Ol - shamamen 15 274 teńge. Endi, shilde aiynan bastap bazalyq zeinetaqy eńbek ótili men zeinetaqy júiesine qatysý merzimine qarai tólenedi.
«Máselen, zeinetkerdiń eńbek ótili bolmasa, sosyn zeinetaqy jinaqtaý júiesine múldem qatyspasa, ia bolmasa, eńbek ótili 10-aq jyl bolsa, oǵan jańaǵy eń tómengi kúnkóris deńgeiiniń 54 protsentin - 15 274 teńgeni tólei beredi. Al 10 jyldan artyq eńbek ótili bar adamǵa qosymsha árbir jyl úshin 2 protsent qosylady. Sonda 33 jyldyq eńbek ótili bar adam bazalyq zeinetaqynyń tolyq mólsherin - 28 284 teńgeni ala alady. Árbir adam óziniń zeinetaqy mólsherin «elektrondy úkimet» portalynan, ia bolmasa, «Azamattarǵa arnalǵan úkimettiń» front-keńselerinen bile alady. Sol jerde tolyq anyqtamany da alýǵa múmkindik bar», - dep atap kórsetti S.Jaqypova.
