Foto: gov.kz
Memleket basshysynyń Jarlyǵymen 2025 jyl jumysshy mamandyqtarynyń jyly bolyp jariialandy. Tehnikalyq jáne kásiptik bilim berý júiesin reformalaýdy júzege asyrý maqsatynda Úkimetpen jumysshy mamandyqtar jylyn uiymdastyrý jónindegi respýblikalyq jospar bekitildi, sondai-aq Ministrlikpen kásiptik-tehnikalyq bilim berýdi transformatsiialaýdyń 2025-2027 jyldarǵa arnalǵan Jol kartasy qabyldandy, dep Oqý-aǵartý ministrliginiń baspasóz qyzmeti.
Atap ótý kerek, elimizdiń barlyq óńirlerinde jumysshy mamandyqtarynyń imidjin ilgeriletý, kadrlar daiarlaýdyń sapasyn arttyrý, jumys berýshilermen yntymaqtastyqty keńeitý sharalary qamtylǵan Jumysshy mamandyqtarynyń jylyna arnalǵan josparlar ázirlendi.
Búginde Qazaqstanda kásiptik-tehnikalyq bilim berý júiesinde 772 kolledj jumys isteidi, onda 565 myń stýdent oqidy. 2024 jyldyń qorytyndysy boiynsha tehnikalyq jáne kásiptik bilim berýdegi memlekettik tapsyrys kólemi 143 myń oryndy qurady, al stýdentterdiń stipendiiasy eki esege ósti.
Is-sharalar josparynda óńirlik erekshelikter eskerile otyryp jasalǵan Jańa kásipter men quzyretter atlasy, tehnikalyq jáne kásiptik bilim berýdi transformatsiialaý, halyqaralyq deńgeidegi sertifikattalǵan mamandardy daiyndaý, jumysshy oryndaryn qurý, jumysshy mamandardyń quqyqtaryn qorǵaý jáne mártebesin kóterý qamtylǵan. Kásiporyndarmen birlesip elimizdiń mektepterinde 1000 beiindi synyp ashylady.
«Kásiptik baǵdar berýdiń reformasy oqýshylarǵa eńbek naryǵyndaǵy jańa talaptar týraly bilýge, ekonomikanyń naqty sektorlaryndaǵy mansap perspektivalaryn baǵalaýǵa jáne mamandyqtardy durys tańdaýǵa múmkindik beredi. Bul úshin mektepterdegi kásibi baǵdarlaý qyzmeti kúsheitiledi, osy arqyly oqýshylar tolyǵymen kásibi diagnostikamen qamtylady. Joǵary synyp oqýshylaryn praktikalyq daǵdylarǵa jáne kolledjder bazasynda alǵashqy jumys kásibine oqytý tájiribesi engiziledi», - dep atap ótti oqý-aǵartý ministri Ǵani Beisembaev.
Memleket kolledjerdi jan basyna shaqqandaǵy qarjylandyrýdyń jańa normativin qabyldady. Qazirgi ýaqytta bir stýdentti oqytýǵa bólinetin qarajattyń ortasha mólsheri 437 myń teńgeni qurasa, kelesi oqý jylynan bastap naqty kórsetkishterge jetken kolledjder úshin ol ortasha eseppen 912 myń teńgeni quraityn bolady.
«Básekege qabiletti mamandar daiarlaý, bilim uiymdaryn zamanaýi materialdyq-tehnikalyq quraldarmen jabdyqtaý jáne pedagogterdiń biliktiligin arttyrý biz úshin basty basymdyq», – dedi oqý-aǵartý ministri.
Dýaldy oqytý júiesin damytý jáne kásiporyndardyń maqsatty tapsyrysy negizinde mamandar daiarlaý úshin biznes-qurylymdar men investorlardy belsendi túrde tartý josparlanýda.
Qazirgi ýaqytta kolledjderge 518 kásiporyn sheftik qamqorlyq kórsetedi, olardyń sanyn 4 myńǵa deiin jetkizý josparlanýda, kásiptik standarttardyń, MJMBS jáne WorldSkills standarttarynyń talaptaryn eskere otyryp, 8 myńǵa jýyq bilim berý baǵdarlamasy ázirlendi. Biyl kolledjder men jumys berýshiler 2 myńnan astam bilim berý baǵdarlamasyn daiyndaidy, sondai-aq óndiristik bazada 1,5 myń pedagogtiń taǵylymdamadan ótýi josparlanýda.
Tehnikalyq jáne kásiptik bilim berýdi transformatsiialaý barysynda Qazaqstannyń 10 kolledji internatsionaldandyrylady.
Sheteldik kolledjdermen tájiribe almasý pedagogterdiń kásibi quzyrettilikterin arttyrýǵa, sondai-aq stýdentterdiń akademiialyq utqyrlyq sheńberinde óz bilimderin jetildirýine múmkindik beredi.
Memleket basshysy bastamashylyq etken Jumysshy mamandyqtarynyń jyly aiasynda Astanada tehnikalyq jáne kásiptik bilim berý stýdentterin qoldaý jáne damytý úshin Ulttyq quzyrettilik ortalyǵy qurylady.
«Ortalyq stýdentterdiń kásibi quzyrettilikteri men daǵdylaryn damytýǵa yqpal etedi, sondai-aq mamandardy qaita daiarlaý, olardyń biliktiligin arttyrý jáne WorldSkills chempionattaryn ótkizý bazasyna ainalady», – dep atap ótti Ǵani Beisembaev.
Jumysshy mamandyqtar jylyndaǵy mańyzdy sharalardyń biri - biylǵy jyly Aqtaý qalasynda túrkitildes elder arasynda Turkiskills – 2025 alǵashqy kásibi sheberlik chempionaty ótedi.
