QR Eńbek jáne xalyqty áleýmettik qorǵaý vitse-ministri Svetlana Jaqypova eńbek etý qabiletinen aiyrylýǵa qatysty áleýmettik tólemniń qalaisha ózgeretinin túsindirdi. Atalǵan tólemder mindetti áleýmettik saqtandyrý qorynan berilip otyrady, dep xabarlaidy QazAqparat tilshisi.
Vitse-ministrdiń aitýynsha, búginde eńbek etý qabiletinen aiyrylý boiynsha áleýmettik saqtandyrý qorynan beriletin tólemaqynyń mólsheri 22 988 teńgeni quraidy. Al jańa júie aiasynda atalǵan tólem 32,5 paiyzǵa artady.
«Mysaly, adamnyń ortasha ailyq tabysy 100 myń teńgeni, al jalpy eńbek etý qabiletinen aiyrylý deńgeii 65 paiyzdy jáne (qorǵa - avt.) qatysý ótili 85 aidy quraityn júiege qatysýshy úshin jańa parametrlerdi eskergendegi tólem mólsheri 31 080 teńgeni quraityn bolady», - dedi S.Jaqypova búgin depýtattarǵa áleýmettik saqtandyrý máseleleri boiynsha keibir zańnamalyq aktilerge ózgerister engizý týraly zań jobasyn tanystyrý kezinde.
Onyń sózine qaraǵanda, atalǵan tólemge múgedektigi boiynsha memlekettik áleýmettik járdemaqy tólemin qosý qajet. «2019 jyly 2-shi toptaǵy múgedek úshin mólsher 45 438 teńgeni quraidy. Sáikesinshe, eki tólemniń jalpy somasy 76 518 teńgeni quraityn bolady», - dep atap kórsetti S.Jaqypova.
Aita keteiik, búgin QR Eńbek jáne xalyqty áleýmettik qorǵaý ministrligi Májilis depýtattaryna mindetti áleýmettik saqtandyrý máseleleri boiynsha keibir zańnamalyq aktilerge ózgerister engizý týraly zań jobasyn tanystyrdy.
