Zeinetaqy júiesin odan ári jańǵyrtýdyń 2030 jylǵa deiingi tujyrymdamasyna 2023 jyldan bastap jumys berýshiler tóleitin 5 paiyzdyq mindetti jarnany qyzmetkerdiń jeke menshigi retinde bekitý usynylyp otyr, dep habarlaidy QazAqparat.
Bul týraly QR Eńbek jáne halyqty áleýmettik qorǵaý ministrliginiń Áleýmettik saqtandyrý, bazalyq, áleýmettik jáne zeinetaqymen qamsyzdandyrý saiasaty departamentiniń direktory Viktoriia Shegai aitty.
«Bul jerde jumys isteitin uiymdardyń bári, sonyń ishinde memlekettik, kvazimemlekettik sektor, jeke sektor týraly aityp otyrmyz. Ókinishke qarai, búgingi tańda álemde keńinen taralǵan halyqaralyq tájiribeniń bolýyna qaramastan, jumys berýshi óz qyzmetkerlerin zeinetaqymen qamtamasyz etýge is júzinde qatyspaidy. Bul fakt. Memleket, adamnyń ózi jáne jumys berýshi arasynda jaýapkershilikti bóletin teńdestirilgen júieni is júzinde qurý úshin biz ony zeinetaqy júiesinde de ornatýdy usynyp otyrmyz», - dep túsindirdi sarapshy.
5% jarna 2023 jyldyń qańtarynan bastap engizilmek. Ministrlik ókili bul merzim buǵan deiin 2 ret shegerilgenin eske saldy.
«Is júzinde bul túzetýler zańnamalyq deńgeide qabyldanyp qoiǵan. Negizi, 2018 jyly qoldanysqa enýi kerek edi. Ol kezde mindetti áleýmettik-meditsinalyq saqtandyrý qoryna jumys berýshilerdiń jarna tóleitini eskerilip, 2020 jylǵa shegerilgenin bilesizder. Ol kez pandemiiaǵa dóp keldi de, norma endi 2023 jyldyń 1 qańtarynan kúshine enetin bolyp otyr. Tujyrymdama jobasy aiasynda biz qandai ózgerister qarastyryp jatyrmyz? Biz zeinetaqy jinaqtaýshylardyń shotyna aýdarylatyn jarnalardyń mólsheri men búkil mehanizmdi túgel kórsetemiz. Buǵan deiin tujyrymdamada jarnalardyń 5%-y tólem aýdarylmaǵan qyzmetkerdiń menshigi emes dep qarastyrylsa, biz usynyp otyrǵan ózgerister boiynsha ony árbir qyzmetkerdiń jeke jinaqtaryn tolyqtyrýshy jarna retinde qaraýdy usynalyp otyr», - deidi Viktoriia Shegai.
Iaǵni, jumys berýshi aýdarǵan 5 paiyzdyq zeinetaqy jarnasy qyzmetkerdiń menshigi bolmaq.
«Tólem kim úshin júrgizilse, sonyń paidasyna jarnalar jeke zeinetaqy shotynda kórsetiletin bolady. Bul is júzinde onyń menshigi bolady, oǵan belgili bir jaǵdailarda qol jetkizýge quqyly. Sonyń biri - jalpyǵa birdei belgilengen zeinetkerlik jasqa jetý», - dep atap ótti ministrlik mamany.
Onyń aitýyna qaraǵanda, qyzmetkerler zeinetaqy shottaryna tiisti jarnalardyń túsip turýyna múddeli bolýy kerek.
«Tiisti tapsyrmalar boiynsha, zeinetaqy jinaqtarynyń bir bóligin paidalaný quqyǵy berilip, bul azamattardyń zeinetaqy júiesine degen senimin arttyrdy. Jeke shottan úzindi-kóshirmeni qaraý úshin ótinishterdiń sany qanshalyqty artqanyn kórip otyrmyz. Bizde azamattar úshin tólem ýaqtyly júrgizilmegende nemese ol múldem júrgizilmegende ótinishter sany artty», - deidi Viktoriia Shegai.
