Foto: Kazakh Tourism
Shýche-Býrabai kýrorttyq aimaǵynyń simvolyna ainalǵan «Jumbaqtas» jartasy erekshe desertke shabyt berdi, dep habarlaidy Ult.kz.
«Sapa belgisi» baǵdarlamasyna qatysýshy «La Crème» meiramhanasy tabiǵi kórikti jerlerge qurmet kórsetýdiń erekshe jolyn tańdady – olar áigili shokolate, konditerlik óner boiynsha Eýropa chempiony Hans Ovandomen birlesip «Jumbaqtas» atty gastronomiialyq týyndyny usyndy.
Jańa desert arqyly otandyq týrizmniń mádeni jáne tabiǵi qundylyqtaryna nazar aýdartý kózdelip otyr. Deserttiń quramyna Býrabai óńiriniń tabiǵi ónimderi, onyń ishinde jergilikti omartadan alynǵan bal kirgen. Jobany La Crème meiramhanasynyń negizin qalaýshy Dana Kanapina bastama etip kóterip, 2024 jyly Hans Ovandomen birge Býrabaiǵa arnaiy baryp, «Jumbaqtas» tarihymen tanysyp, jergilikti turǵyndardan málimet jinaǵan.
«Bizdiń maqsatymyz – bir desert arqyly Býrabaidyń ásemdigi men onyń tarihi-mádeni mańyzyn jetkizý. Mundai jerlerge degen súiispenshilik sanaly týrizm mádenietin damytýǵa yqpal etedi», – dedi La Crème kompaniiasynyń teń quryltaishysy Asqar Qanapin.
Foto: Kazakh Tourism
Kazakh Tourism kompaniiasy júzege asyryp jatqan «Sapa belgisi» baǵdarlamasy da osy baǵytta jumys isteidi. Uiym qazaqstandyq kásipkerlerdiń tabiǵi muralardy dáripteýge degen yntasyn joǵary baǵalaitynyn aityp otyr. Búginde bul baǵdarlamaǵa 220-dan astam kompaniia qatysýda. Baǵdarlama 2021 jyldan beri qonaqjailylyq deńgeiin arttyrýǵa, týrizm salasyndaǵy qyzmet kórsetý sapasyn jaqsartýǵa baǵyttalǵan jáne «Very Nice» pen «Nice» deńgeileri boiynsha beriledi.
«Jumbaqtas» deserti – dám men maǵynany ushtastyrǵan erekshe joba. Ol otandyq gastronomiia men týrizmniń toǵysqan sáti retinde elimizdiń brendteriniń birine ainalýy múmkin.
