Básekelestikti qorǵaý jáne damytý agenttiginiń tóraǵasy Serik Jumanǵarin memlekettik satyp alý salasyndaǵy basty problemalardy atady, dep habarlaidy "QazAqparat" HAA.
«Memlekettik satyp alý salasynda bir kózden satyp alý degen tetik bar ekenin bilesizder. Jalpy sońǵy kezde onyń úlesi tómendedi. 2016 jyldy alsaq, bul kórsetkish 48 paiyzǵa deiin jetken bolatyn. 2020 jyly 40 paiyzǵa tústi. Al 2019 jyly 34 paiyz bolǵan edi. Qalai degenmen de úlesi azaiyp keledi. Bul jaqsy – kórsetkish.
Sońǵy bes jylda jiyntyǵy 7,7 trln teńge bolatyn memlekettik satyp alý iske asyrylǵan. Bul kóp pe, az ba? Básekeli satylymdarda budan áldeqaida kóp somaǵa satyp alý júrgiziledi. Bir kózden tikelei satyp alý kólemi 2016 jylmen salystyrǵanda 2 paiyz azaidy degenmen, aýktsion arqyly satyp alýdyń úlesi artqanymen, tikelei kelisimshart bekitý men bir kózden satyp alý úlesi 50 paiyzdan asady – 57 paiyz», - dedi agenttik basshysy «QazAqparat» halyqaralyq aqparat agenttiginiń alańynda ótken Orep Space kezdesýde.
Onyń aitýyna qaraǵanda, memlekettik satyp alý salasynda ózekti problemalar barshylyq.
«Jalpy memlekettik satyp alý salasynda problemalar bar. Satyp alýdyń negizsiz joǵarylatylǵan talaptary, belgili bir jetkizýshilerdiń múddesine lobbi jasaý, «beibit» básekelestik quryp, satyp alý rásimin qaitadan ótkizbeý úshin básekelespen birlesip áreket etý, tapsyrys berýshi tarabynan qarajatty únemdeý múddesiniń bolmaýy siiaqty problemalar bar. Eń bastysy - Memlekettik satyp alý týraly zańda tikelei kelisimshart jasaý arqyly bir kózden satyp alý uiymdastyrýǵa jol beretin 52 negizdeme qarastyrylǵan», - dedi Serik Jumanǵarin.
