sýret ashyq derekkózden alyndy
Birge turatyn júkti áieline jábir kórsetken qaraǵandylyq er adam jazadan qutylyp ketti, - dep habarlaidy Tengrinews.kz saity.
Qaraǵandy qalasy Álihan Bókeihan aýdanynyń soty birge turǵan júkti áieldi uryp-soǵyp, bóten erkekpen jynystyq qatynasqa túsýge májbúrlegen er adamǵa qatysty qylmystyq isti qarady.
Qylmystyq is QR QK-niń 123-baby "Jynystyq qatynas jasaýǵa, erkek pen erkektiń jynystyq qatynas jasaýyna, áiel men áieldiń jynystyq qatynas jasaýyna nemese seksýaldyq sipattaǵy ózge de áreketterge májbúr etý" boiynsha sotqa jiberildi. Jábirlenýshiniń advokaty sottalýshy shynymen de áieldi dosymen jynystyq qatynasqa túsýge májbúrlegenin dáleldeýge tyrysty.
Jábirlenýshi tarap ókiliniń barlyq ýájine qaramastan, sot sottalýshynyń kinásin dáleldenbegen dep tapty. Jábirlenýshiniń advokatynyń aitýynsha, ol kúdiktini 121-bap "Seksýaldyq sipattaǵy zorlyq-zombylyq áreketteri" boiynsha jaýapqa tartýdy talap etken.
"Kúdikti óz nietin sońyna deiin jetkizbegendikten, prokýratýra qylmys quramy joq dep sheshti. Sodan keiin biz ony 107-bap "Densaýlyqqa qasaqana ortasha aýyrlyqtaǵy ziian keltirý" sanatyna aýystyrýdy suradyq. Qylmystyq is sotqa jiberildi. Sot ony kináli dep tanyp, onyń buryn sottylyǵy bar ekenin eskere otyryp, oǵan barlyǵy úsh jyl bas bostandyǵynan aiyrý jazasy taǵaiyndaldy. Jábirlenýshi tarap sot úkimine shaǵymdanbaq bolǵanymen, biraq apelliatsiialyq shaǵym ózgerissiz qaldyryldy", - dedi áieldiń advokaty.
Bul joly jábirlenýshi tarap sottalýshy men onyń dosyn 123-bap "Jynystyq qatynas jasaýǵa, erkek pen erkektiń jynystyq qatynas jasaýyna, áiel men áieldiń jynystyq qatynas jasaýyna nemese seksýaldyq sipattaǵy ózge de áreketterge májbúr etý" boiynsha qylmystyq jaýapkershilikke tartqysy kelgen.
"Biraq sot olardyń kinási dáleldengen joq dep sheshti. Biz sotta jábirlenýshiniń sottalýshyǵa materialdyq jáne moraldyq táýeldi ekenin dáleldegenimizben, biraq sot muny eskermedi. Soǵan qaramastan, bul úkimniń ústinen shaǵymdanatyn bolamyz", - dedi jábirlenýshiniń advokaty Ibragim Sadvoqasov.
Álihan Bókeihan aýdandyq sotynyń baspasóz qyzmeti aqtaý úkimine qatysty túsinikteme berdi. Jábirlenýshi qylmystyń obektivti jaǵyn asha almai, qylmystyq quqyq buzýshylyqty jasaý ádisin, atap aitqanda, bopsalaýdyń qalai bolǵandyǵyn tolyq sipattap bermegen.
"Bopsalaý áreketi jáne jábirlenýshiniń júkti jaǵdaiyn paidalaný qylmystyq quqyq buzýshylyq bolyp tabylmaidy. Sot aiyptaý isinde kórsetilgen mán-jailardy, sondai-aq usynylǵan dáleldemelerdi nazarǵa aldy. Barlyǵyn eskere otyryp, is-áreketterinde qylmystyq quqyq buzýshylyqtyń joqtyǵyna bailanysty aiyptaý baby boiynsha sottalýshylardy aqtaý týraly sheshim shyǵaryldy", - delingen sot baspasóz qyzmetinde.
Eske salaiyq, buǵan deiin Qaraǵandyda er adam birge turatyn júkti áieldi uryp-soǵyp, dosyn qýantý úshin jynystyq qatynasqa túsýge májbúrlegen bolatyn. Jasalyp jatqan buzaqylyǵy týraly túsirilgen video áleýmettik jelide tarap, talas-tartys týdyrdy. Keiin Oktiabr aýdandyq soty áieldiń kúieýin jábirlenýshiniń densaýlyǵyna qasaqana ortasha aýyrlyqtaǵy ziian keltirgeni úshin kináli dep taýyp, úsh jylǵa bas bostandyǵynan aiyrdy. Er adam buǵan deiin de sottalǵan.
