Júktiliktiń on ekinshi aptasyna deiin esepke turǵan bolashaq analarǵa 425 myń teńge tólenýi múmkin. Densaýlyq saqtaý ministrligi zań jobasyna osyndai norma engizýdi kózdep otyr, dep habarlaidy Sputnik Qazaqstan tilshisi.
Densaýlyq saqtaý ministri Eljan Birtanov eger zań jobasyna engizilgen ózgertýler qabyldansa, onda júkti áielderge 425 myń teńge tólenetinin rastady. Biraq bárine birdei emes, tek júktiliktiń on ekinshi aptasyna deiin esepke turǵan bolashaq analarǵa ǵana.
Densaýlyq saqtaý máseleleri jónindegi zań jobasynda júkti áielderge eń tómengi jalaqynyń on eselengen mólsheri shamasynda tólem tóleý týraly norma qarastyrylǵan.
Sondai-aq, Birtanovtyń aitýynsha, halyq densaýlyǵy týraly jańa kodeks aiasynda azamattardyń óz densaýlyǵyna jaýapkershiligin kúsheitý kózdelip otyr.
"Ókinishke qarai, qazir azamattar óz densaýlyǵyna salǵyrt qaraidy, kóp jaǵdaida dárigerlerdiń aralasqanyn kútedi. Biraq, tym kesh bolyp qalatyn jaǵdailar jii kezdesedi. Sondyqtan sharalardyń deni profilaktikaǵa, sonyń ishinde, vaktsinatsiiaǵa baǵyttalǵan", - dedi ministr úkimette ótken baspasóz máslihatynda.
Zań jobasynda, tipti, densaýlyǵyna nemquraily qaraǵan azamattar úshin ákimshilik jaýapkershilik engizý de qarastyrylǵan.
"Biz ana men balanyń densaýlyǵyna baǵyttalǵan sharalar keshenin usynýdy jón kórdik. Atap aitsaq, olardy der kezinde esepke turýǵa yntalandyrǵymyz keledi. Sondai-aq, ýaqytynda esepke turmaityn, dárigerge qaralmaityn, ekpeden bas tartatyndar úshin ákimshilik jaýapkershilik engizýdi usyndyq", - dedi vedomstvo basshysy.
Qazir bul usynystardyń barlyǵy talqylanyp jatyr.
