«Mańǵyshlaq-Aqtóbe» jolaýshylar poiyzynyń júk tielgen vagonynda bolǵan órtten zardap shekken 11 jasar bala men onyń ákesi sanaviatsiiamen Aqtaýǵa jetkizildi, dep habarlaidy "Ult aqparat".
Beineý aýdandyq ortalyq aýrýhanasynyń bas dárigeriniń mindetin atqarýshy Ásiia Shontybaevanyń aitýynsha, er adamnyń denesiniń 45 paiyzyn kúiik shalǵan. Al, balanyń denesiniń 60 paiyzy jaraqattanǵan.
«Sanaviatsiia dárigerleri Beineýge keldi. Mamandarmen konsiliým ótti. Nátijesinde denesiniń 45 paiyzyn kúiik shalǵan er adam men denesiniń 60 paiyzy jaraqattanǵan 11 jastaǵy balany Aqtaýǵa alyp ketti. Al, denesiniń 80 paiyzy janyp ketken Qazposhta jolseriginiń jaǵdaiy óte aýyr bolǵandyqtan, tasymaldaýǵa jaramaidy. Ol aýdandyq aýrýhananyń jansaqtaý bóliminde qaldyryldy. Dárigerlerdiń jiti baqylaýynda bolady. Onymen birge jaralanǵan taǵy eki naýqas ta ázirshe aýdandyq aýrýhanada emdeledi. Erteń sanaviatsiia taǵy kelip, dárigerlerdiń sheshiminen soń alyp ketýi múmkin», - dedi ol.
Aita keteiik, búgin tańǵy saǵat 04.30-da Mańǵystaý oblysynyń Beineý aýdanynyń aýmaǵynda № 109 «Mańǵyshlaq-Aqtóbe» jolaýshylar poiyzyna tirkelgen júk vagony órtendi.
QR Tótenshe jaǵdailar ministrliginiń málimetinshe, júk vagonynda gaz ballony jarylǵan. Saldarynan 5 adamdy kúiik shaldy – eki jolserik, bir inkassator, bir Qazposhta qyzmetkeri jáne on jasar bala. Olardyń barlyǵy júk vagonynda boldy.
«Balanyń júk vagonynda qaidan júrgenin biz aita almaimyz, bul suraqty «Qazaqstan temir joly» kompaniiasyna qoiýy kerek. Biz óz tarapymyzdan balanyń bolǵanyn rastaimyz, Qazposhta qyzmetkeri 10 jasar balasyn ózimen birge alyp júrgen. Barlyǵy túrli dáreje kúiik alyp, Beineý aýdandyq ortalyq aýrýhanasyna jatqyzyldy», - degen bolatyn QR TJM resmi ókili Talǵat Ýáli.
