Soltústik Qazaqstan oblysynda kásipkerler palatasyna byltyr biznes ókilderi shamamen 800 ret óz máselelerimen júgingen, – dep habarlaidy «Ult aqparat».
SQO kásipkerler palatasy baspasóz qyzmetiniń málimetine súiensek, kásipkerlerdiń 86-sy memlekettik organdar tarapynan zańsyz is-áreketke shaǵymdanǵan. Shaǵymnyń 80-ni qaralyp, 59 oń sheshildi. Osylaisha 300 mln teńgeden artyq somaǵa biznesmenderdiń quqyǵyn qorǵady.
«Oblystyń kásipkerleri kóp jaǵdaida jer jáne salyq boiynsha, aýyl sharýashylyǵy, sonyń ishinde sýbsidiia bólý máselelerimen shaǵymdanady. Óńir diqandaryna gerbitsid pen tyńaitqyshtarǵa jumsalǵan qarajatty qaitarý ońaiǵa soqpady. Másele túrli deńgeide – aýyl sharýashylyǵy basqarmasynan bastap, ministrlikte de qaraldy. «Atameken» kásipkerler palatasy men Bas prokýratýranyń da aralasýyna týra keldi», – deidi SQO kásipkerler palatasy direktory Jeńis Qaziev.
Qazirgi tańda sýbsidiia alý máselesi sheshildi. 2020 jyldyń aqpan aiyna deiin Jeke sáikestendirý nómeri (JSN) men Biznes sáikestendirý nómeri (BSN) biriktiriledi, nátijesinde fermerler men sharýa qojalyqtary memlekettiń qoldaýyna súiene alady. Osy jáne basqa da máseleler jyl boiy kásipkerler quqyǵyn qorǵaý jáne kásipkerler palatasynyń sybailas jemqorlyqqa qarsy keńesteriniń otyrystarynda talqylandy.
