"Aqiqat" jalpyhalyqtyq sotsial-demokratiialyq partiiasy jańa basshyny sailap aldy, dep habarlaidy Sputnik Qazaqstan.
Saiasi uiymnyń músheleri óz kóshbasshysy Ermurat Bápidi partiianyń qatarynan shyǵaryp tastady. Onyń ornyna Ashat Raqymjanov sailandy. Buǵan deiin jańa basshy partiianyń astanalyq filialyn basqarǵan.
Partiianyń Almaty qalalyq filialynyń jetekshisi Tazabek Sambetbaidyń aitýynsha, burynǵy basshy ózine júktelgen mindetterdi tolyǵymen oryndai almady.
"Ol basshy retinde biliksiz boldy jáne saiasatker retinde qalyptaspady. Bizde qazaqstandyq zańnama boiynsha sottalǵan adamdardyń san alýan toptarymen kelissóz júrgizgeni týraly dálelder bar. Budan bólek, saiasi uiymdy basqarý ádisterine qatysty syn-eskertpeler bolǵan", - deidi Sámbetbai.
Aita keteiik, Jalpyhalyqtyq sotsial-demokratiialyq partiiasyn 2006 jyly 7 tamyzda qurylǵan bolatyn. Sol kezde partiia tóraǵasy qyzmetine Jarmahan Tuiaqbai sailanǵan. 2009 jyly atalǵan saiasi uiym men "Azat" demokratiialyq partiiasy birigip, "Azat" jalpyhalyqtyq sotsial-demokratiialyq partiiasyn qurdy. Jarmahan Tuiaqbai men Bolat Ábilov jańa uiymnyń teń tóraǵalary boldy. Al bas hatshy qyzmetin Ámirjan Qosanov atqardy.
2012 jyly partiia parlament májilisiniń sailaýyna qatysty. Biraq sailaýshylardyń 1,59% daýysyn jinap, májiliske óte almady. Tórt jyldan keiin taǵy da osy sailaýǵa qatysyp, 1,18% daýyspen ótpei qalǵan.
2019 jyly 6 sáýirde saiasi uiym "Aqiqat" jalpyhalyqtyq sotsial-demokratiialyq partiiasy bolyp qaita quryldy. Tóraǵasy bolyp jýrnalist Ermurat Bápi taǵaiyndalǵan bolatyn.
