Foto: QR DSM
Densaýlyq saqtaý ministrligi JRVI men pnevmoniia jaǵdailarynyń kóbeiýine bailanysty júkti jáne bosanǵan áielderge kórsetiletin meditsinalyq kómekti kúsheitti. Bul sharalar bolashaq analarǵa sapaly ári ýaqtyly meditsinalyq kómek kórsetýge baǵyttalǵan, dep habarlaidy Ult.kz.
Ministrlik óńirlerge pýlmonologtar, infektsionister, reanimatologtar, sondai-aq meditsinalyq joǵary oqý oryndary men respýblikalyq klinikalardyń akýsher-ginekologtarynan quralǵan kópbeiindi kóshpeli meditsinalyq komandalardy jiberdi. Olardyń negizgi maqsaty – óńirlik meditsina qyzmetkerlerine ádistemelik qoldaý kórsetý, meditsinalyq kómektiń sapasyn arttyrý jáne respýblikalyq ári jergilikti deńgeidegi ózara is-qimyldy nyǵaitý.
Sapar barysynda mamandar 1000-nan astam meditsina qyzmetkerine keńes berip, oqytý jumystaryn júrgizdi. Sonymen qatar klinikalyq jaǵdailar taldanyp, virýstyq infektsiialar men asqynýlary bar patsientterdi emdeý tásilderi naqtylandy. Patsientterdi marshrýttaý, uiymdastyrýshylyq protsester baǵalanyp, aýyr jaǵdaidaǵy naýqastarǵa praktikalyq kómek kórsetildi.
Júkti áielderdiń jaǵdaiyna erekshe nazar aýdaryldy. Nátijesinde 2000-nan astam júkti áielge, onyń ishinde aýyr háldegi patsientterge meditsinalyq kómek kórsetilip, beiindi mamandardyń qatysýymen emdeý taktikasyna túzetýler engizildi.
Densaýlyq saqtaý ministrligi epidemiologiialyq jaǵdaidy baqylaýdy jalǵastyryp, bolashaq analar men jańa týǵan sábilerdiń densaýlyǵyn qorǵaý úshin barlyq qajetti sharalardy qabyldaitynyn málimdedi.
