Qazaqstan Respýblikasy Premer-ministriniń orynbasary Eraly Toǵjanov bastaǵan úkimettik delegatsiia jumys saparymen Jezqazǵanǵa keldi. Ol «Jumyspen qamtý jol kartasy» baǵdarlamasy boiynsha jumys barysymen tanysyp, óńirdiń ózekti máseleleri men olardy sheshý joldaryna nazar aýdardy, dep hzabarlaidy "Ult aqparat" oblys ákimdigine silteme jasap.
Mańyzdy máselelerdiń biri - Jezqazǵan qalasyndaǵy apatty úilerdegi turǵyndardy kóshirý. Eraly Toǵjanov jumys sapary barysynda osy máselege nazar aýdardy.
- Oblys ákimine bul máseleni baqylaýǵa alýdy jáne kelesi jyldyń sońyna deiin ony sheshýdi tapsyramyn, - dedi Eraly Toǵjanov Qaraǵandy oblysynyń basshysyna.
- Oblysta barlyǵy 54 úi apatty dep tanyldy, onyń 26-y osynda. Biyl qalalyq biýdjetten aqsha bólindi. Máseleni sheship jatyrmyz, - dep sendirdi Qaraǵandy oblysynyń ákimi Jeńis Qasymbek.
Jezqazǵan men Sátbaev qalalarynda halyqqa úzdiksiz sý berý máselesi de ózekti bolyp tur. Jezqazǵan jurtshylyǵy Eraly Toǵjanovqa osy máselemen júgindi.
- Qaraǵandy oblysynyń ákimimen bul máseleni talqyladyq. Ony sheshý joldaryn qarastyramyz, - dedi Eraly Toǵjanov.
- Biz Keńgirden shyǵatyn rezervtik sý tartqyshty salýdamyz. Ol eki ai aralyǵynda iske qosylady. Sondai-aq Esqula sýaǵaryn salý jobasyn iske asyrýǵa kirisemiz. Nátijesinde, 15% sý Jezqazǵanǵa Esqula sý qubyrynan, 55-60%-y Úitas-Aidos sý taratqyshynan jáne qalǵany Keńgirden tartylady, - dedi Jeńis Qasymbek.
Jezqazǵanda jalpy somasy 3,9 mlrdteńge bolatyn 36 infraqurylymdyq joba júzege asyrylýda. Sondai-aq, qalada 58 kópqabatty turǵyn úidiń qasbeti men shatyryn, 1,5 shaqyrym káriz jáne sý qubyry jelilerin, 34 shaqyrym joldy jóndeý josparlanyp otyr. Sonymen qatar, eki saiabaq abattandyrylady, 800-den astam jaryqtandyrý baǵany ornatylady.
Jumyspen qamtýdyń jol kartasy boiynsha myńnan astam jumys orny ashylady, 600-ge jýyq adam jumyspen qamtý ortalyǵy arqyly jumysqa ornalasady.
Jumys sapary barysynda Eraly Toǵjanov 900 oryndyq mektepti aralap kórdi. Barlyq jumystar kestege sáikes júrgizilýde. Qazirgi ýaqytta nysan aiaqtalýǵa jaqyn. Aýlanyń aýmaǵyn abattandyrý, kógaldandyrý, jihaz jáne qural-jabdyqtar alý qaldy.
Ulytaý aýdanyndaǵy Joshy han tarihi-mádeni ortalyǵynyń qurylys alańy da Premer-ministr orynbasarynyń nazarynan tys qalǵan joq. Jóndeý jáne qurylys úshin «Eńbek» memlekettik baǵdarlamasyna qatysatyn jumysshylar tartylady.
Sondai-aq, qazir Joshy han men Alasha han kesenelerinde qalpyna keltirý jumystary júrip jatyr.
- Kesenelerdi qalpyna keltirý kezinde birinshi kezekte tarihi qundylyqty saqtaý qajet. Prezident osy kesenelerdi qalpyna keltirýdi baqylaýǵa aldy. Barlyǵyn sapaly jasaý mańyzdy. 2020 jyly bul mańyzdy oqiǵalardyń biri bolmaq, - dedi Eraly Toǵjanov.
Ulytaý aýdanynda Jumyspen qamtýdyń jol kartasy aiasynda 18 infraqurylymdyq jobany júzege asyrý josparlanýda. Bul Qarsaqpai jáne Jezdi aýyldaryndaǵy sporttyq - saýyqtyrý keshenderiniń, Ulytaý kentindegi tazartý nysanynyń qurylysy, sondai-aq bilim berý salasynda úsh joba, mádeniet salasynda tórt joba jáne TKSh-nyń segiz jobasy. 522 jumys orny qurylady, onyń ishinde 263 adam jumyspen qamtý ortalyǵy arqyly jumysqa ornalasady.
