QR BǴM Bilim jáne ǵylym salasyndaǵy baqylaý komitetiniń tóraǵasy Gúlzat Kóbenova JOO salasyndaǵy reiting ýniversitetterge qalai áser eteninin aitty, dep habarlaidy QazAqparat.
«Atameken» UKP júrgizgen reitingtiń nátijesi ministrlik tarapynan qanshalyqty paidalanylady? Eń bastysy, memlekettik bilim tapsyrysyn ornalastyrǵan kezde paidalanylady. Bul jerde talapkerler oqýǵa túser barysynda qai JOO-da qandai reiting qalyptasqanyn kóre alady. Ekinshiden, joǵary oqý oryndary túlekteriniń jumysqa ornalasý máselesi de bar. Búginde árbir JOO bir jyl ishinde túlekteriniń kem degende 50 paiyzyn jumysqa ornalasýyn nazarda ustaýy qajet. Júrgizilgen reiting barysynda túlekterdiń jumysqa turýy respýblika boiynsha ortasha eseppen 74 paiyz qurady. Degenmen, JOO-lardaǵy bilim berý baǵdarlamasynyń deńgeii ártúrli. Osy turǵyda joǵary oqý oryndary jumystaryn jandandyrýy kerek», - dep toqtaldy komitet basshysy Ortalyq kommýnikatsiialar qyzmetindegi baspasóz máslihatynda.
Onyń sózine qaraǵanda, ministrlik tarapynan reiting kórsetkishi tekseris barysynda paidalanylady.
«Eń bastysy, búginde joǵary oqý oryndaryna tekseris júrgizilgen kezde profilaktikalyq baqylaý retinde iske asyrylady. Eger de JOO-da kórsetkishteri tómen bolsa, iaǵni jumysqa ornalasý kórsetkishinen bólek stýdentterdiń úlgerimi, bilim deńgeii, bilim berý baǵdarlamalarynyń sapasy boiynsha eskeriledi. Qazirgi kezde tekserý nátijesi boiynsha árbir oqý ornyna hattama toltyrylady. Onyń negizinde kemshilikterdi joiý úshin JOO-ǵa tiisti ýaqyt beriledi. Ekinshi márte qarastyrylǵan kezde kemshilikter joiylmasa, onda materialdar sheshim qabyldaý úshin sotqa jiberiledi nemese tiisti shara qoldanylady», - dedi Gúlzat Kóbenova.
Budan buryn habarlanǵandai, «Atameken» ulttyq kásipkerler palatasy eki jyl qatarynan QR Bilim jáne ǵylym ministrligi men «Eńbek resýrstaryn damytý ortalyǵy» AQ-men birlesep, otandyq joǵary oqý oryndarynyń bilim berý baǵdarlamalaryna táýelsiz baǵalaý júrgizip keledi. Búgin elordada sol reitingtiń nátijesi jariialandy.
Belgili bolǵandai, otandyq JOO-daǵy bilim berý baǵdarlamalarynyń 73 paiyzy jumys berýshilerdiń suranysyna sai kelmeidi.
