QR Bilim jáne ǵylym ministrligi JOO-ny ligaǵa bólý boiynsha 4 sanatty jariialady, dep habarlaidy "Ult aqparat".
«Bilim jáne ǵylym ministrligi JOO-«shańsorǵyshtardy» anyqtaý saiasatyn jalǵastyrýy tiis. Bul rette ádil jumys isteitin JOO-lar da memlekettik baqylaýdyń qatań saiasatynan zardap shegedi. Osyǵan bailanysty joǵary oqý oryndaryn ligalar boiynsha saralaý usynysy qoldaý tapty, ol buryn Ulttyq qoǵamdyq senim keńesiniń otyrysynda aityldy. Mundaǵy birinshi sanat – halyqaralyq deńgeide básekege qabiletti JOO-lar. Olarǵa qoiylatyn basty kriterii ǵylymi zertteýlerdiń joǵary deńgeii bolady. Iaǵni, ǵylym bilim berý baǵdarlamalaryna ún qosatyn jáne el ekonomikasyna yqpal etetin ýniversitetter. Mundai JOO-lar 100% akademiialyq derbestikke ie bolady. Olardy memlekettik baqylaýdan bosatý da tekserýge alańdamaýǵa múmkindik beredi. Tolyq senim prezýmptsiiasy bolady», - dep jazdy QR Bilim jáne ǵylym ministri Ashat Aimaǵambetov facebook jelisinde.
Ministrdiń aitýynsha, ekinshi sanatta – ulttyq deńgeide básekege qabiletti joǵary oqý oryndary bolmaq. Olarǵa da birinshi sanattaǵy joǵary oqý oryndarymen birdei akademiialyq erkindik beriledi jáne tekserýlerden bosatylady.
«Úshinshi sanatqa kelsek, barlyq óńirlik JOO-lar respýblikalyq deńgeide básekelese almaidy, alaida olar óńirlerde qalǵan stýdentterge jaqsy bilim deńgeiin beredi jáne «ózderiniń» bilim alýshylaryna qarai baǵdarlanady. Óńirlik nemese salalyq joǵary oqý oryndary (úshinshi sanat) akademiialyq erkindiktiń úlken kólemin ielenedi. Bul JOO-lar táýekelderdi baǵalaý júiesi boiynsha ǵana tekseriletin bolady», - deidi A. Aimaǵambetov.
Atalǵan úsh sanatqa kirmeitin ózge oqý oryndary tórtinshi sanatqa toptastyrylady.
«Olar tolyq kólemde turaqty memlekettik baqylaýǵa alynady, olar úshin osy JOO-larǵa degen senim men sapanyń tómen deńgeiine bailanysty kóptegen talaptar men normalar qoldanylady. Joǵary oqý oryndaryn 4 sanatqa saralaýdyń negizinde JOO-lardyń bilim men ǵylymnyń sapasyn arttyrý boiynsha básekelestigi jatyr, al básekelestik, ózderińiz biletindei, árdaiym paidaly bolmaq», - deidi vedomstvo basshysy.
Eske sala ketsek, QR Prezidenti Qasym-Jomart Toqaev Ulttyq keńes otyrysynda joǵary oqý oryndaryn ligalarǵa bólip, básekelestikti arttyrýdy usynǵan edi.
