Temirjol salasyndaǵy problema bilet tapshylyǵymen shektelmeidi. Qoǵam qairatkeri, arnaiy monitoring tobynyń múshesi Murat Ábenov avtomobil joldary men kóliktik baqylaý salasyndaǵy sybailas jemqorlyqqa qarsy kúres máselesine arnalǵan keńeste osylai dep málim etti, dep habarlaidy QazAqparat.
Murat Ábenov el arasynda jol sapasy men «Sergek» júiesiniń jumysyna qatysty kóptegen shaǵym bar ekenin aita kele, temirjol salasynda qordalanǵan máselelerge toqtaldy.
«Bilet tapshylyǵymen temirjol salasyndaǵy problemalar shektelmeidi. Jolserikterdiń adam zorlaý boiynsha sottalýy salada júieli problemalar bar ekenin kórsetip otyr. Keshegi rezonansty oqiǵadan keiin buryn da ondai qylmystar ashylmai qalǵan shyǵar degen kúdik týady. Bul oqiǵa jolserik jumys ornynda ishimdik iship, kimdi qai jerge otyrǵyzǵysy kelse ózi biledi degen oi qalyptastyrady», - degen qoǵam belsendisi bilet saýdasyna qatysty alypsatarlyqtyń aldyn alýda kórshi elderdiń qandai sharalarǵa barǵanyn mysalǵa keltirdi.
«Mysaly Ózbekstanda perronǵa bileti bar jolaýshydan basqa adamdardy ótkizbeidi. Osy siiaqty qarapaiym tásilderdi bizge qoldaný kerek. Bilet saýdasyn baqylaý jolaýshylardyń qaýipsizdigimen tikelei bailanysty», - dedi ol.
Sondai-aq, Murat Ábenov biletti alyp satýmen ainalysatyn adamdardy quqyq qorǵaý organdarynyń naqty jaýapqa tarta almai otyrǵanyn synǵa aldy. Prokýratýra ókilderiniń bilet alyp satqyshtardy jolaýshylardyń mazasyn alǵany úshin ǵana jaýapqa tarta alatyny meni tańǵaldyrdy. Prokýratýra bulai qaýqarsyzdyq tanytsa, qalǵan organdar týraly aitýdyń ózi artyq shyǵar. Barlyǵynyń aitatyny bir ýáj – biletti satyp alýshynyń zań buzǵanyn dáleldeý múmkin emes. Prezidenttiń ózi bul máseleni qatań tapsyryp otyr. Sondyqtan zańnamalyq negizde máseleniń túiinin tabý qajet», - dedi qoǵam qairatkeri.
