«Tulpar-Talgo» poiyzynyń jolserikterinen zorlyq kórgen aqtóbelik boijetken qazaqstandyqtarǵa jáne el basshylyǵyna úndeý jariialady. Úndeý mátini «NeMolchiKZ» qoǵamdyq qorynyń Facebook-tegi paraqshasynda jariialandy, dep habarlaidy QazAqparat.
«Árqaisyńyzǵa shynaiy alǵysymdy bildiremin. Qanshama pikir oqydym, BAQ betinen reportajdar kórdim. Halyq pikiriniń arqasynda bul qylmystyń jalpyhalyqtyq talqylaýǵa túskenin bildim. Elimizde kez kelgen áiel men balanyń zorlyq-zombylyqqa ushyramaǵanyn qalaimyn, olar ózderiniń mundai jaǵdaida qorǵany baryn jáne qorǵaýdyń kásibi turǵyda bolatynyn bilse eken deimin», - delingen boijetkenniń jazbasynda.
Jábirlenýshi osy ýaqytqa deiin ýaiymdaǵanyn jáne áli de qaiǵyǵa túsip kele jatqanyn atap ótti.
«Men birneshe jyl boiy ózimniń jeke qaýipsiz álemimdi qurdym, kóp oqydym, birneshe elde boldym,túrli mádenietti kórdim jáne asqan súiispenshilikpen elime oralyp júrdim. Men óz elimde, úiimde qorǵaýda júrgenime sendim. Biraq, árqaisymyz kez kelgen sátte, kez kelgen jerde mundai jaǵdaiǵa tap bolatynyna kózim jetti. Sol túnnen asqan qorqynyshty nárseniń bolmaitynyn bilgendeimin, sol minýttarda álem quryp ketkendei kórindi. Alaida, sodan keiin men tergeý jáne sot kezinde ótý kerek bolatyn qorqynyshty synaqtarǵa tap boldym. Maǵan tap bolǵan moraldyq zorlyq-zombylyq pen kemsitýdi qaita zorlaýmen salystyrýǵa bolady. Maǵan kúdiktiler tarapyndaǵy «qoldaý tobynyń», sot pen tergeýdiń qysymyna qarsy turý ońai bolǵan joq. Men eń qorqynyshty kúnderdiń artta qalǵanyna qýanyshtymyn jáne mundai jaǵdai eshkimniń basyna túspegenin qalaimyn!» - dep jazdy jábirlenýshi.
Sondai-aq, ol el basshylyǵyna zorlyq-zombylyq jasaǵandarǵa jazalaýdy qatańdatý boiynsha sharalar qoldanýǵa ótinish bildirdi.
«El basshylyǵy men QR Parlamentiniń depýtattaryna jynystyq zorlyqshylarǵa jazany qatańdatý, quqyq qorǵaý organdarynyń qyzmetkerleri úshin biryńǵai is-qimyl algoritmin jasaý týraly ótinish bildiremin», - dep túiindedi boijetken.
Eske salsaq, ǵylymi konferentsiiadan qaityp kele jatqan boijetkendi «Talgo» poiyzynda zorlady degen kúdik boiynsha eki jolserikke qatysty qylmystyq is sotqa jetti. Keiin bul oqiǵa boiynsha «Jolaýshylar tasymaly» AQ túsinik berdi. 26 shilde kúni Qostanaida «Tulpar-Talgo» poiyzynda aqtóbelik boijetkendi zorlaǵan eki jolserikke qatysty sot úkimi shyqty.
