QR Prezidenti Qasym-Jomart Toqaevtyń halyqqa Joldaýy asa bir tarihi qiyn, kúrdeli kezeńde joldanyp otyr. Mundai pikirdi aqyn, Memlekettik syilyqtyń iegeri Nurlan Orazalin bildirdi, dep habarlaidy QazAqparat.
«Bul Joldaýynda Qasym-Jomart Kemeluly, eń áýeli, halyqtyń áleýmettik-turmystyq jaǵdaiyna mán berdi. Búgingi kúniń problemasyn kóterdi. Azyq-túlik baǵasynyń turaqsyzdyǵyna erekshe toqtaldy. Qazirgi tańda ár jerde ár túrli baǵamen satylyp jatqan azyq-túlikke jol bermeý kerektigi aityldy. Meniń kókeiime qonǵan taǵy bir nárse – halqymyzdyń 40 paiyzynan astamy aýyldyq jerde turady. Búginde jerdi sheteldikterge satýǵa jáne jalǵa berýge tyiym salynǵany belgili. Aýyldy jetildirý úshin jerdi igerý máselesine nazar aýdardy. Memleket basshysy jaiylymdyq jerlerdi orynsyz paidalanatyndar sharýa qojalyqtarynyń ósip-ónýine múmkindik bermei otyr degendi ashyp aitty», - deidi aqyn.
Sonymen qatar, ol Joldaýda oqý-aǵartý isin damytýǵa qatysty biraz jaqsy jańalyqtar aitylǵanyn atap ótti.
«Ǵylymdy damytý, grant merzimin 5 jylǵa kóshirýi men granttyń oryndalýyn tekserip otyrýy. Bul ainalyp kelgende, eldiń ishki damýyn qamtamasyz etetin kriterii dep esepteimin. Muǵalimderge biyl da qoldaý kórsetiledi. Álbette, balalardyń saýatty, bilimdi bolýy mańyzdy, olar bizdiń bolashaǵymyz. Alaida, biýdjetten qamtamasyz etilip otyrǵan basqa da mamandar bar. Mysaly, mádeniet, sport salasy. Aldaǵy 2022 jyldyń 1 qańtarynan bastap osynyń báriniń jalaqysyn ósiredi jáne arǵy jyldarda da 20 paiyzdan qosyp otyrýdy jalǵastyrmaq. Osylaisha eldiń turmystyq jaǵdaiyn kóteredi. Bul durys dep oilaimyn», - deidi Nurlan Orazalin.
Joldaý barysynda respýblikadaǵy eń tómengi jalaqy kólemin 42 500 teńgeden 63 000 teńgege deiin kóterý týraly tapsyrma berildi.
«Sonymen qatar, turǵyn úi máselesi syndy taqyryptardy qamtý eldiń ekonomikalyq, áleýmettik jaǵdaiyn retke keltirýdiń naqty usynystary bolyp tur. Bul da durys. Bizdiń qansha otandastarymyz sol zeinettik jasqa jetpei ketip qalyp jatyr. Ásirse, pandemiia kezinde talai asyldarymyzdan aiyrylyp qaldyq. Bir sózben aitqanda, Memleket basyshysy áleýmettik-turmystyq jaǵdaidy retteýdi tiisti úkimet organdaryna naqtylap berdi», - deidi ol.
Sóz sońynda Nurlan Orazalin Joldaý eldiń ishki tutastyǵyn qamtamasyz etýge, syrtqy abyroi, bedelin arttyrýǵa baǵyttalǵanyn tilge tiek etti.
