«Jolaýshylar tasymaly» AQ-tyń jaqynda ǵana taǵaiyndalǵan bas direktor Mihael Kortiým jaýapty mekemeniń jumys josparymen bólisti, dep habarlaidy QazAqparat.
«Strategiia boiynsha biz «jyldam jeńiske» jetýdi kózdep otyrmyz. Máselen, tósek jailardy retteý, tazalyqty qamtamasyz etý boiynsha jumystardy kúsheitemiz. Munda shaǵymdardyń kóbeiip ketkeninen habardarmyn. Qyzmet sapasyn arttyrý úshin jańa tasymaldaýshylarmen jumys bastaýdy jón dep sheshtik. Sonymen birge, kelesi jyldyń jazyna deiin, tipti osy qysta vagondardyń jetispeýshiligi máselesin sheshýdi kózder otyrmyz. Osy maqsatta jóndeý tsehtarymen kelissózder júrgizilýde. Sondai-aq, jańa vagondar jetkiziledi. Alǵashqy vagondar kelesi aptada keledi. 22 qazanda taǵy da qosymsha vagondar alamyz», - dedi ol elordada ótken baspasóz máslihatynda.
Mihael Kortiýmnyń aitýyna qaraǵanda, kompaniia bilet satýdyń aqparattyq júiesin jaqsartýdy maqsat tutady. Budan bólek, kompaniia basshysy «Jolaýshylar tasymaly» AQ-nyń uzaq merzimdegi maqsattary týraly da sóz qozǵady.
«Aldaǵy ýaqytta vagon parkin jańartýdy kózdeimiz. Sebebi, keibir vagondar jóndeýdi qajet etedi. Vagondardyń jaramdylyǵy – 30-40 jyl. Sondyqtan, biz qazir 2030-2040 jyldar týraly aityp otyrmyz. Vagondardy jańartýdyń tiimdi strategiiasy kerek. Eýropadaǵy vagondar da 40-50 jyl boiy toqtaýsyz júre beredi. Bul rette joalýshylar tasymalynyń naryǵyn zerttep, klientterdiń suranysyn, qandai balama tasymal júiesi zerttep alýymyz kerek. Sebebi, aldaǵy ýaqytta naqty qansha jolaýshylardy tasymaldaýymyz kerektigin bilip alǵan abzal», - deidi ol.
Mihael Kortiým sol sekildi kompaniianyń óz ishiniń IT-qurylymy ázirlenip jatqanyn atap ótti. Onyń aitýynsha, bul bastama arqyly kompaniianyń shyǵynyn edáýir azaitýǵa bolady. Budan bólek, kompaniiada marketingtik strategiialyq baǵyt, klientterdi arttyrý maqsaty boiynsha jumys júrgizilmek.
«Barlyq nazarymyz klientterdiń kóńilinine shyǵýda. Men úshin, eń aldymen, klientterdiń qanaǵattanýy óte mańyzdy», - dedi Mihael Kortiým.
Eske sala ketsek, nemis mamany Mihael Kortiým «Jolaýshylar tasymaly» AQ-nyń Bas direktory bolyp bir ai buryn taǵaiyndalǵan bolatyn.
