Memleket jol boiynda talapqa sai dárethana ustaityn kásipkerlerge ai saiyn 83 myń teńge tólemekshi. Ol úshin jol boiynda dárethanadan bólek ózge de servistik nysandar bolýy shart, dep habarlaidy QazAqparat.
Ortalyq kommýnikatsiialar qyzmetinde ótken brifiingide Týrizm indýstriiasy komitetiniń tóraǵasy Dastan Ryspekov osyndai málimet berdi.
«Bárimiz jol boiyndaǵy dárethanalardyń sapasy syn kótermeitinin kórip júrmiz. Indýstriia jáne infraqurylymdyq damý ministrligi men oblystardyń ákimdikteri birlesip, 2019 jyly sanitariialyq-gigienalyq toraptarǵa túgendeý júrgizdi. Áli de sanitariialyq toraby bar 962 servis nysany qajet», - deidi Dastan Ryspekov.
Ol, sondai-aq, qazir bul ispen «QazAvtoJol» kompaniiasy ǵana biýdjet esebinen ainalysyp júrgenin eske saldy.
«Ózderińiz biletindei, «QazAvtoJol» sońǵy 2 jylda respýblikalyq mańyzdaǵy joldardyń boiyna talapqa sai sanitarlyq toraptar ornatyp jatyr. Al bul isti kásipker isteitin bolsa, sanitarlyq-gigienalyq torapty kútip ustaý úshin ai saiyn 83 myń teńge sýbsidiia tólenedi. Bul oblystyq jáne aýdandyq mańyzy bar joldarǵa, týrister jinalatyn negizgi oryndardaǵy jeke turǵan statsionarlyq úi-jailarǵa da, ózin-ózi aqtaýy tómen jol boiyndaǵy servis obektilerine de qatysty bolady. Bul qarajat tehnikalyq personaldy ustaý men qajetti jabdyqty satyp alý shyǵynyn azaitady», - dedi komitet tóraǵasy.
