2019-2020 oqý jylynyń basynda Qazaqstanda 125 joǵary oqý orny jumys istedi. Bir jyl ishinde joǵary bilim salasynda kórsetilgen qyzmetterdiń kólemi 10 paiyzǵa ósti, dep habarlaidy "Ult aqparat" finprom.kz resýrsyna silteme jasap.
Atalǵan bilim ordalarynyń 84-i nemese 67,2 paiyzy - jeke menshik joǵary oqý oryndary (JOO). JOO-lardyń basym bóligi elimizdiń basty úsh iri qalasy - Almaty (41 JOO), Nur-Sultan (15) jáne Shymkentte (10) shoǵyrlanǵan.
Al stýdentterdiń jalpy sany - 604,3 myń. Bul buǵan deiingi oqý jylyndaǵy stýdentter sanynan (542,5 myń) 11,4 paiyzǵa kóp.
Jalpy, stýdentter sanynyń 79,6 paiyzy - kúndizgi bólimde, 14,9 paiyzy - syrttai jáne 5,5 paiyzy - keshki bólimde bilim alady. Bul rette barlyq stýdentterdiń 39,9 paiyzy memlekettik joǵary oqý oryndarynda oqidy.
Memlekettik bilim granty esebinen oqityn stýdentterdiń sany - 180,1 myń (29,8 paiyz), aqyly negizde oqityndar - 424,3 myń (70,2).
Osy oqý jylynyń basynda respýblika JOO-larynda stýdentterge bilim beretin oqytýshylardyń sany 38,5 myń adamǵa jetti. Onyń ishinde 3,3 myń (8,5 paiyz) adam - ǵylym doktory, 12,7 myń (33,1) - ǵylym kandidaty, 2,5 myń (6,4) - professor, 5,9 (15,3) myń oqytýshynyń - dotsent dárejesi bar. Filosofiia doktory ǵylymi dárejesi bar oqytýshylar - 2,6 myń (6,8 paiyz), beiin boiynsha doktorlar - 235 (0,6), magistr akademiialyq dárejesi bar oqytýshylar - 13 myń (33,9).
2019 jyldyń qańtar-qyrkúieginde joǵary bilim salasyndaǵy qyzmetterdiń kólemi 229,5 mlrd teńgeni qurap, bir jyl ishinde 10,8 paiyzǵa ósti. 2018 jyldyń dál osyndai kezeńindegi soma 207,1 mlrd teńge bolǵan edi.
Óńirlik shekte joǵary oqý oryndary kórsetken qyzmetterdiń eń kólemi Almaty qalasynda tirkelip, 84,8 mlrd teńgeni qurady. Bul el bioynsha jalpy somanyń 37 paiyzyna teń. Úzdik úshtik qatarynda Nur-Sultan qalasy (57 mlrd teńge) men Qaraǵandy oblysy (14,7 mlrd teńge) bar. Sonymen qatar TOP-5 óńirge Shymkent qalasy (12,8 mlrd teńge) men Aqtóbe oblysy (9,6 mlrd teńge) kiredi. Atalǵan bes óńirdiń joǵary bilim salasynda kórsetken qyzmetteriniń jalpy kólemi 178,9 mlrd teńgeni quraidy.
