JMZJ engizý azamattarǵa qosymsha zeinetaqy tólemin alýǵa múmkindik beredi, dep habarlaidy "Ult aqparat" Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
"QR Áleýmettik kodeksiniń jobasynda zeinetaqy júiesiniń tiimdiligin arttyrý boiynsha jańa sharalar paketi qarastyrylǵan. Olardyń biri – 2023-2027 jyldar kezeńinde jumys berýshilerdiń mindetti zeinetaqy jarnalaryn kezeń-kezeńimen engizý. Bul zeinetkerlik demalysqa shyqqan azamattarǵa jinaqtaýshy júieden qosymsha zeinetaqy tólemin tóleýge múmkindik beredi.
Búgingi tańda Qazaqstanda bazalyq jáne yntymaqty zeinetaqyny, sondai-aq BJZQ-dan zeinetaqy tólemin (qyzmetkerdiń zeinetaqy jinaqtary esebinen qalyptastyrylady) qamtityn kóp deńgeili zeinetaqy júiesi qalyptasty" - delingen habarlamada.
Vedomstvo málimetinshe, zeinetaqynyń yntymaqty bóligi jyl saiyn azaiatyny belgili, óitkeni ony taǵaiyndaý kezinde 1998 jylǵy 1 qańtarǵa deiin, iaǵni jinaqtaýshy júie engizilgenge deiin jasalǵan eńbek ótili eskeriledi. Bul rette jumyskerdiń 10% BJZQ-ǵa jarnalary tiisti zeinetaqy mólsherin qamtamasyz etý úshin jetkiliksiz.
Álemdik tájiribede zeinetaqymen qamtamasyz etýde jumys berýshige mańyzdy ról bólingenin atap ótken jón. Mysaly, Malaiziiada jumysker tabysynyń 23%-ynan jumys berýshiler zeinetaqy qoryna 12%, qyzmetker – 11%; Avstraliiada 9,5%-yn tek jumys berýshi tóleidi; Belarýste – 29%, onyń ishinde jumys berýshi – 28%; Germaniiada – 18,6%, onyń ishinde jumys berýshi –– 9,3% tóleidi.
"Qazaqstanda JMZJ engizý halyqty zeinetaqymen qamsyzdandyrý jaýapkershiligin memleket, jumys berýshi jáne qyzmetker arasynda bólýge múmkindik beredi,sondai-aq joǵalǵan tabysty barabar zeinetaqy tólemderimen almastyrýdy qamtamasyz etýge yqpal etetin bolady.
Kásipkerlik sýbektileriniń múddelerin eskere otyryp, kún tártibinen tys kezeńde jumys berýshilerge túsetin júktemeni azaitý maqsatynda QR Áleýmettik kodeksiniń jobasynda 5 jyl ishinde JMZJ kezeń-kezeńmen engizý kózdelgen" - deidi ministrliktiń baspasóz qyzmeti.
Bul shara zeinetaqysynyń mólsheri olardyń zeinetaqy aýdarymdaryna tikelei bailanysty bolatyn 1975 jyldan keiin týǵan qazaqstandyqtardy qoldaýǵa baǵyttalǵan. Olardyń zeinetaqysy úsh komponentten quralady: memleketten bazalyq zeinetaqy, jinaqtaýshy zeinetaqy – BJZQ-ǵa óz aýdarymdary esebinen jáne shartty-jinaqtaýshy zeinetaqy-jumys berýshiler jarnalary esebinen.
Shartty-jinaqtaýshy quramdaýysh jinaqtaýshy (aýdarymdar kezeńi jáne olardyń jiyntyq kólemi tirkeledi) jáne yntymaqty (túsken qarajat 1975 jyldan keiin týǵan jáne zeinetkerlik jasqa jetken júiege qatysýshylarǵa zeinetaqy tóleýge baǵyttalatyn bolady) zeinetaqy júieleriniń artyqshylyqtaryn qamtidy.
