Ótken juma kúni Aqtóbe qalasyndaǵy T.Bigeldinov atyndaǵy Qazaqstan Respýblikasy Qarýly Kúshteri Áýe qorǵanysy kúshteri áskeri institýtynyń ǵimaratynda áskeri-patriottyq jumystardy jetildirý máseleleri boiynsha qoǵamdyq tyńdalym ótti. Oǵan QR Qarýly kúshteri Bas shtaby bastyǵynyń orynbasary, general-maior Muhamedjan Talasov, atqarýshy bilik ókilderi, sala mamandary men kýrsanttar qatysty.
Sharanyń ózi respýblikalyq «Jiger-2017» áskeri-patriottyq lageriniń jumys jospary aiasynda uiymdastyryldy. Atalǵan lager osy jyldyń 10-15 qyrkúiek kúnderi aralyǵynda Aqtóbede shymyldyǵyn túrgen-di. Maqsat — jastar arasynda Otanǵa qyzmet etý ideiasyn qalyptastyrý jáne ony qorǵaý, bul sala boiynsha atqarylyp jatqan ideologiialyq jumystardy odan ári damytý. Jigitter 5 kúnge sozylǵan shara barysynda áskeri daiyndyq boiynsha sheberlik saǵattaryna, áskeri-qoldanbaly sport túrinen jarystarǵa, áskeri-dalalyq oiyndar men estafetalarǵa qatysyp, ózderiniń bilimi men biligin arttyrýǵa kúsh saldy. Sondai-aq, jer-jerden jinalǵandarǵa «Máńgilik El» ideiasy, Elbasynyń «Bolashaqqa baǵdar: rýhani jańǵyrý» baǵdarlamalyq maqalasynyń jai-japsary keńinen túsindirildi. Jalpy, lagerge qatysýshylar sany — 80. Olardyń arasynda áskeri-patriottyq klýbtardyń ókilderi, kásiporyndardaǵy jastar isi jónindegi komitetterdiń tóraǵalary, memlekettik mekeme qyzmetkerleri, t.b. bar.
— Elbasy Nursultan Nazarbaev jastarǵa arnap aitqan bir sózinde: «Uly qundylyqtardy ulyqtai bilý árbir jastyń, barshamyzdyń jaýapkershiligimizdegi is. Patriot bolý degenimiz óziniń elin maqtan etý, tarihyn bilý, eliniń jarqyn bolashaǵyn jasaýǵa óz úlesin qosý», — degen edi. Osy jiynnyń negizgi maqsaty — Elbasynyń «Máńgilik el» ideiasynyń maqsaty men mindetterin túsindirý, jańa qazaqstandyq patriotizm sezimin oiatý. Osyǵan orai jergilikti bilik ókilderi men quzyrly organ mamandary laiyqty jumys júrgizýde, — degen QR Qarýly kúshteri Bas shtaby bastyǵynyń orynbasary, general-maior Muhamedjan Talasov lager jumysyn uiymdastyrǵandarǵa alǵysyn bildirip, oblys ákiminiń orynbasary Erbol Nurǵalievke QR Qarýly kúshteriniń 25 jyldyǵyna arnaiy shyǵarylǵan merekelik medal tabystady. Óz kezeginde Erbol Nurǵaliev:
— Áýeli barlyq jastarǵa, qatysýshylarǵa kieli, qutty meken — Aqtóbege qosh keldińizder demekpin. Bul lager aiasynda birtalai jastar bir-birimen qaýyshyp, ózara tájiribe almasty. Olardyń lagerge qatysty jyly lebizderin estip, ishimizden riza boldyq. Jalpy, jastardyń arasyndaǵy mańyzdy baǵyttardyń biri — áskeri-patriottyq tárbie. Bul bizdiń bolashaǵymyz úshin óte mańyzdy. Osyndai sharalardy qoldaýǵa biz árqashan daiynbyz, — dedi.
Basqosý sońynda joǵaryda atalǵan lager jumysyna belsene aralasqandarǵa sertifikattar berilip, qurmet kórsetildi.
Aibek Serikuly
