Jezqazǵanda birneshe investitsiialyq jobany júzege asyrý kózdelip otyr. Onyń ishinde oblystaǵy birinshi bioelektrostantsiia ashý jospary bar. Aimaqty damytý boiynsha alǵa qoiylǵan josparlar týraly búgin ortalyq kommýnikatsiialar qyzmetindegi brifingte Jezqazǵan qalasynyń ákimi Qairat Begimov aityp berdi, dep habarlaidy "Ult aqparat".
«2020 jyly biz jalpy investitsiia kólemi 18,1 mlrd teńgeni quraityn jáne 350-den astam jańa jumys ornyn qurýmen 4 jańa jobany iske qosýǵa daiynbyz. Bul qara mys kontsentrattaryn gidrometallýrgiialyq óńdeýdiń tájiribelik zaýytyn salý, ónerkásiptik reagentti shyǵarý boiynsha himiia zaýytyn salý, qurylys materialdaryn óndirý boiynsha zaýyt salý jáne bioelektrostantsiia salý siiaqty jobalar. Nátijesinde 2020 jyldyń qorytyndysy boiynsha negizgi kapitalǵa salynǵan investitsiia kólemi 32 mlrd teńgeni quraidy», - deidi Qairat Begimov.
Qala basshysynyń aitýynsha, bioelektrostantsiia qurylysyn jyl sońyna deiin aiaqtaý josparlanyp otyr. Bul kásiporyn qatty turmystyq qaldyqtardy kádege jaratady jáne óńdeidi.
«Bioelektrostantsiia Keńgir aýylynan eki shaqyrym jerde 4,5 gektar alańda ornalasqan. Ol jasyl tehnologiia Meriolizis biregei printsipin jumysta paidalanady. Qaita óńdeletin qaldyqtar gazǵa sintezdelip, odan ári elektr energiiasyna ainalady. Jezqazǵan óńirinde bul - «Kaz Green Energy» JShS-men birlesip iske asyrylatyn Slovakiiadan kelgen E-Zhasyl «GrupoANKA» kompaniiasynyń alǵashqy jobasy. Oǵan salynatyn investitsiia kólemi - 7-8 mlrd teńge», - dep habarlady Jezqazǵan qalasynyń ákimi.
