Foto: wikimapia.org
Jezqazǵan qalasynyń ákimshilik quqyq buzýshylyqtar jónindegi mamandandyrylǵan sotynda oblystyq prokýratýra múlkine zaqym keltirgen er adamǵa qatysty ákimshilik is qaraldy.
Sotta anyqtalǵandai, oqiǵa 2025 jyldyń 30 tamyzynda saǵat 05:23 shamasynda bolǵan.
"Er adam masań kúide bola tura Ulytaý oblysy prokýratýrasynyń ǵimaratynyń qaqpasyn dosynyń úii dep oilap, qaqpany asha almaǵannan keiin uryp-soqqan jáne qaqpa janyndaǵy temir paraqty qasaqana búldirgen", - dep jazylǵan habarlamada.
Sot otyrysynda Ulytaý oblysy prokýratýrasynyń ókili keltirilgen shyǵynnyń mólsheri — 259 484 teńge 40 tiyn ekendigin málimdedi jáne shyǵynnyń ishinara ótelgenin habarlady.
Quqyq buzýshy sotta óz kinásin moiyndap, istegen áreketine ókinetinin jetkizdi; sondai-aq shyǵynnyń jaqynda tolyq kólemde óteletinin aitty. Meditsinalyq kýálandyrý nátijesi boiynsha azamat ortasha dárejeli alkogoldik masań kúide bolǵany anyqtalǵan.
Sot er adamnyń is-áreketinde ákimshilik quqyq buzýshylyqtyń quramy bar dep tanyp, oǵan 5 táýlikke ákimshilik qamaqqa alý jazasyn taǵaiyndady.
