Foto:gov.kz
Jetisý oblysy Eskeldi aýdany Kókjazyq aýylynyń turǵyndary jergilikti ákimniń qyzmetten ketýin talap etip otyr, - dep habarlaidy Tengrinews.kz.
Jergilikti turǵyndardyń aitýynsha, aýyldyq okrýg ákimi Saǵadi Taldybaev ákimshilikti 20 jyldan beri basqaryp keledi. Alaida turǵyndar osy jyldar ishinde jumys nátijesin kórmedik deidi. Olardyń aitýynsha, aýylda Internet te, kósheler, joldar men balalar alańdarynda jaryq ta joq.
"Ol bizdi tyńdamaidy. Ákim kreslosynda 20 jyldan asa otyr, biraq atqarylǵan jumys joq. Biz jaryq, balalar oiyn alańyn suradyq. Nátije joq. Eń qiyn máselelerdiń biri - Internet. Bizge jaqyn kórshi aýyldarda Internet bar. Bul másele kóterilgennen beri 3-4 jyl ótti, bizge tek ýáde berip keledi. Ákimniń otstavkaǵa ketýin talap etemiz. Kóktemgi jinalysta, mamyrda, bári, onyń ishinde alań, stadion, jaryq, jol bolady dep aityldy, biraq nátije áli joq", - deidi jergilikti turǵyndar.
Eskeldi aýdany ákimdiginiń resmi saity derekterine sáikes, Saǵadi Taldybaev Kókjazyq aýyldyq okrýginiń ákimi qyzmetine eki ret taǵaiyndalǵan: 1998 jyldan 2012 jylǵa deiin jáne 2016 jyldan búgingi kúnge deiin. Ákimniń ózi barlyq máselelerdi bir sátte sheshý múmkin emes dep sanaidy.
"Barlyǵy josparǵa sáikes júrip jatyr, kezeń-kezeńmen sheshiledi. Demalys kúnderi biz kóshe jaryǵynyń 10 baǵanasyn aýystyrdyq, sport alańy salynyp jatyr. Iá, Internet máselesin sheshý qiyn, óitkeni aýyldyń geografiialyq jaǵdaiy múmkindik bermeidi. Aýyl tómengi jazyqta ornalasqan. Qazirgi ýaqytta okrýgtiń úsh aýylynda taza aýyzsý bar, mektep oqýshylaryn avtobýspen mektepke jetkizemiz dep maqtana alamyn", - deidi Saǵadi Taldybaev.
Qyzmetten ketýi jáne kelesi merzimge ákimshilik basshysy bolyp sailaýǵa qatysýy týraly Saǵadi Taldybaev jaýap bergen joq.
