Qarjylyq barlaý Qarjylyq monitoring agenttiginiń aýmaqtyq departamentterimen birlesip, jetim balalar men ata-ana qamqorlyǵynsyz qalǵan balalarǵa arnalǵan mekemelerde 21 zań buzýshylyǵyn anyqtady. Jalpy shyǵyn somasy 76 mln astam teńgeni quraǵan, dep habarlaidy "Ult aqparat".
«Eń jii jasalǵan buzýshylyqtar qatarynda qyzmetkerlerge jalaqyny zańsyz esepteý jáne olardy býhgalterlerdiń ielenýi, taýarlar men azyq-túlikti joǵary baǵamen satyp alý, senip tapsyrylǵan múlikti ysyrap etý siiaqty derekter boldy.
Mysaly, mekemelerdiń birinde zaǵiptarǵa arnalǵan baǵdarlamalyq qamtamasyz etýi bar noýtbýkterdi satyp alý kezinde biýdjetke keltirilgen shyǵyn 17 mln teńgeden asty.
Aýmaqtar men ǵimarattardy abattandyrýǵa jáne aǵymdaǵy jóndeýine arnalǵan biýdjet qarajatyn urlaý derekteri de oryn aldy. Máselen, jetim balalar men ata-ana qamqorlyǵynsyz qalǵan balalarǵa arnalǵan bir arnaiy mektep-internatta 3 mln teńge jymqyrylǵan. Qarajat ashana shatyryn jóndeýge bólingen.
Qazirgi ýaqytta barlyq buzýshylyqtar boiynsha tergeý sharalary júrgizilýde», - delingen QR Qarjylyq monitoring agenttiginiń habarlamasynda.
Málim etilgendei, barlyq anyqtalǵan fakti Ekonomikalyq tergeý qyzmetine jetkizildi.
