Atyraý oblysy ákiminiń burynǵy orynbasary Baqytgúl Hamenovanyń isine qatysty appeliatsiialyq shaǵymdar tústi, dep habarlaidy QazAqparat.
Atyraý oblystyq sotynyń baspasóz qyzmetinen málim etkendei, Baqytgúl Hamenovanyń isine qatysty apelliatsiialyq shaǵymdar túsken.
«Atyraý qalasynyń №2 sotyna B.Hamenovadan, onyń advokaty I.Vranchevtan, Ý.Adamov pen onyń advokaty K.Adamovadan jáne A.Rysqalievtyń advokaty N.Jolbolovtan apelliatsiialyq shaǵymdar túskenin habarlaimyz. Apelliatsiialyq shaǵymdarǵa bailanysty is áli alqa qaraýyna berilgen joq», - dep habarlady Atyraý oblystyq sotynyń baspasóz qyzmeti.
Budan buryn Atyraýdaǵy №2 qalalyq sot Baqytgúl Hamenovany QR Qylmystyq kodeksiniń 366-babynyń 3-bliminiń 2-tarmaǵymen (Iri kólemde para alý) kináli dep tanyp, 7 jylǵa bas bostandyǵynan aiyrýǵa úkim shyǵardy.
«Sot Baqytgúl Hamenovanyń qabyldaǵan antty buzý arqyly qylmys jasaǵanyn jazany aýyrlatatyn jaǵdai dep tanydy. Jeńildetetin mán-jai retinde jas balalarynyń bary eskerildi. Sottalýshyǵa ómir boiyna memlekettik qyzmette laýazymdardy atqarý quqyǵynan ómir boiyna, 7 jyl merzimge bas bostandyǵynan aiyrý jazasy taǵaiyndaldy. Eki jas balasynyń bolýyna bailanysty QR Qylmystyq kodeksiniń 74-babynyń 1-bóligine sáikes jazany óteý merzimi 3 jylǵa keiinge qaldyryldy», - delingen sottyń habarlamasynda.
Sondai-aq, Baqytgúl Hamenovamen birge tergelgen oblystyq mádeniet, tilderdi damytý jáne arhiv isi basqarmasynyń basshysy basqarma basshysy 7, seriktestik direktory 4 jylǵa sottalǵan bolatyn.
«Sot Aqylbek Rysqalievtyń jazasyn jeńildetetin mán-jai retinde jas balalarynyń baryn, qylmystyq quqyq buzýshylyqtyń basqa qatysýshylaryn áshkereleýin tanydy. Al, Ómirtai Adamov úshin jazasyn jeńildetetin mán-jai retinde zeinetkerlik jasyn, asyraýynda tórt jáne kámeletke tolmaǵan úsh balasy bar eki múgedek balasy bolǵanyn, aýyr qylmystyq quqyq buzýshylyqty otbasylyq jáne basqa da jaǵdailardyń saldarynan jasaǵanyn eskerdi. Sottalýshy Aqylbek Rysqalievqa 7 jyl, Ómirtai Adamovqa 4 jyl merzimge bas bostandyǵynan aiyrý jazasy taǵaiyndaldy», - dep habarlady sottyń baspasóz qyzmeti.
Sottalýshylardyń ekeýi de memlekettik qyzmette laýazymdardy atqarý quqyǵynan ómir boiyna aiyryldy.
