Biyl 9 aidyń ishinde jergilikti qamtýdyń ósý qarqyny ótken jyldyń sáikes kezeńimen salystyrǵanda 6,4 paiyzdy qurady. Bul týraly elimizdiń Premer-Ministri Asqar Mamin Úkimet otyrysynda málim etti, dep habarlaidy QazAqparat.
«Biyl 9 aida jergilikti qamtýdyń ósý serpini ótken jyldyń sáikes kezeńimen salystyrǵanda 6,4 paiyzdy qurady. Qarapaiym zattar ekonomikasynyń 7 salasy boiynsha jergilikti qamtýdyń josparly kórsetkishterine qol jetkizildi, onyń ishinde mashina jasaý, farmatsevtika, jeńil, jihaz, himiia jáne tamaq ónerkásibi. Bul rette, qurylys materialdary óndirisinde josparly kórsetkishke - 77,3 paiyzǵa qol jetkizilgen joq. Biraq bizde áli 1,5 ai bar. Bul sala naryqta zor áleýet pen suranysqa ie. Qarapaiym zattar ekonomikasy taýarlaryn óndirýde jergilikti qamtý úlesi boiynsha Shyǵys Qazaqstan jáne Qostanai oblysy óńirler reitinginiń kósh basynda. Al SQO men Almaty qalasy eń tómen kórsetkishke ie», - dedi Asqar Mamin.
Sondai-aq Premer-Ministr jergilikti qamtýdy damytý ákimderdiń negizgi mindetteriniń biri ekenin atap ótip, olardyń jumysy osy mindet boiynsha baǵalanatynyn aitty.
«Jergilikti qamtýdy baqylaý jónindegi óńirlik komissiialardyń jumysyn jandandyryp, onyń jumysyna otandyq taýar óndirýshilerdi barynsha tartý qajet. Atalǵan komissiialardyń jumysy Aqmola, Soltústik Qazaqstan, Túrkistan, Jambyl jáne Qyzylorda oblystarynda nashar uiymdastyrylǵan. Bul rette qazaqstandyq qamtýdyń damýyn qamtamasyz etý úshin barlyq qajetti sharalar qabyldanýda. Mysaly, ofteik-kelisimsharttar, taýarlardyń elektrondyq katalogy, jer qoinaýyn paidalanýshylarmen erikti kelisimsharttar siiaqty jańa quraldar engizildi», - deidi ol.
Odan bólek, Úkimet basshysy elimizde munai-gaz mashinasyn jasaýdy damytýdyń halyqaralyq ortalyǵy jáne jergilikti qamtýdy damytý qory qurylǵanyn eske saldy.
«Samuryq-Qazyna qory kompaniialarynyń satyp alýdaǵy jergilikti qamtý 75% qurap otyr. Bul oń tájiribeni kvazimemlekettik jáne memlekettik sektorlardyń basqa kompaniialaryna da taratý kerek», - dedi Mamin.
