«Shevron» kompaniiasy jergilikti qamtý úlesin damytýǵa 248,5 mln dollar investitsiia bólmekshi. Úkimet otyrysynda QR Energetika ministri Maǵzum Myrzaǵaliev osyndai málimet berdi, dep habarlaidy QazAqparat.
«Biyl Jergilikti qamtýdy damytýdyń tikelei investitsiialar qory quryldy. «Shevron» kompaniiasy jergilikti qamtý úlesin damytýǵa 248,5 mln dollar investitsiia bóledi. Bul kompaniianyń Qazaqstan aldyndaǵy qaita investitsiialaý mindettemeleri sheńberinde júzege asady.
Investitsiialar tehnologiia men IT, bazalyq taýarlar óndirisi jáne munai-gaz sektoryna arnalǵan jabdyqtardyń jekelegen túrlerin qurastyrý jáne qorshaǵan ortany qorǵaý salalaryna bólinedi», - dedi Maǵzum Myrzaǵaliev.
Onyń aitýnysha, búginde Qor «Astana» halyqaralyq qarjy ortalyǵynyń alańynda tirkelgen. Energetika ministri otandyq taýar óndirýshiler Qazaqstan naryǵyn qandai ónimdermen tolyq qamtyp otyrǵanyn da atady.Olar:
- sendvich panelderi, metall konstrýktsiialary, temirbeton jáne armatýra siiaqty qurylys-montaj materialdary;
- qubyr materialdary;
- ydystar men jylý almastyrǵysh siiaqty mehanikalyq jabdyqtar;
- transformator, elektr qalqandary, siiaqty elektr materialdary;
- kabel, beinebaqylaý júiesi siiaqty telekommýnikatsiia materialdary;
- janar-jaǵarmai materialdary.
Muny Maǵzum Myrzaǵaliev «otandyq taýar óndirisi damýynyń oń qarqyny» dep baǵalaitynyn jetkizdi.
