Shyǵys Qazaqstan oblysyndaǵy Almaty oblysynyń kúnderi aiasynda oblys ákimi Amandyq Batalov bastaǵan resmi delegatsiia Shyǵys Qazaqstan oblysyna saparlady, dep habarlaidy "Ult aqparat" oblysy ákimdiginiń baspasóz qyzmetine silteme jasap.
Sharanyń basty maqsaty mańyzdy óndiristik jáne sporttyq nysandardyń qurylymymen tanysý, tájiribe almasý, saýda, biznes jáne mádeniet salalary boiynsha yntymaqtastyq bailanystardy nyǵaitý bolyp tabylady. Sondai-aq óńiraralyq yntymaqtastyqqa arnalǵan jiyn barysynda qos tarap eki jaqty memorandýmdarǵa qol qoidy.
Jiyn barysynda Almaty oblysynyń basshysy Amandyq Batalov sóz sóiledi. Ol Jetisý óńiriniń áleýmettik-ekonomikalyq damýynyń basym baǵyttary men investitsiialyq múmkindikterine toqtalyp, osy sapar barysynda jetisýlyq delegatsiianyń ShQO-nyń iri óndiristik nysandaryn aralap shyqqandyǵyn atap ótti. Sonymen qatar oblys ákimi Elbasynyń tapsyrmasyna sáikes eki oblystyń arasyndaǵy iskerlik tyǵyz qarym-qatynastyń odan ári damityndyǵyn jáne aldaǵy ýaqytta ekonomikanyń barlyq salalary boiynsha ekijaqty tiimdi yntymaqtastyq áriptestik perspektivalarynyń baryn da tilge tiek etti.
- Almaty oblysy qazir agrarly-indýstrialdy óńir retinde damyp keledi. Óńirde birneshe mańyzdy indýstrialdy aimaqtar qurylýda. Jetisý jeriniń júgeri, mai burshaq, qant qyzylshasy, jemis-kókónis, júzim, et jáne jumyrtqa óndirýdegi respýblikamyzdyń aldyńǵy qatarly agrarlyq óńiri sanalatyndyǵyn eskeretin bolsaq, osyndai tabiǵi taza ári sapaly ónimderdi ShQO-ǵa jetkizý múmkindigimiz bar. Sonymen birge týrizm, bilim, densaýlyq saqtaý, aýylsharýashylyq ónimderin qaita óńdeý salalarynda da ózara yntymaqtastyqty damytýdyń úlken bolashaǵy bar. Sol sebepti búgingi sharamyz yntymaqtastyǵymyzdy odan ári nyǵaitady dep senemin. Óskemen qalasynyń abattandyrylýynda bizge unaǵan, tájiribege engizýge turarlyq kóptegen jańa, tyń sheshimder bar ekenin kórdik. Bul ásirese saiabaq aýmaqtarynda, jaryqtandyrý máselelerinde jáne jalpy qalany turǵyndar men qonaqtardyń kúndelikti turmysyn-tirshiligine, serýendeýine qolaily etýge arnalǵan ózge de oryndarda aiqyn baiqalady. Almaty oblysynda memlekettik-jekemenshik áriptestik mektepke deiingi bilim berý mekemeleriniń qurylysynda keńinen qoldanylsa, Shyǵys Qazaqstan oblysynda mundai áriptestik densaýlyq saqtaý salasynda jaqsy jolǵa qoiylǵanyn baiqadyq. Bul da bir úirenerlik jaqsy úrdis, - dep atap ótti A.Batalov.
Sondai-aq, Amandyq Batalov óz sózinde búgingidei tájiribe almasý eki óńirdiń de turǵyndaryna úlken septigin tigizetindigin atap kórsetti.
Jiynda baiandama jasaǵan Almaty oblysynyń kásipkerlik jáne indýstriialyq-innovatsiialyq damý basqarmasynyń basshysy Marjan Murattyń atap ótkenindei, Almaty jáne Shyǵys Qazaqstan oblystary arasynda shikizat pen daiyn ónimdi jetkizý baǵytynda turaqty bailanystar ornaǵan. Atap aitar bolsaq, tek «Qainar AKB» JShS-nyń ózi ótken jylda ShQO naryǵyna quny 327,4 mln. teńgeniń 22 myń akkýmýliator batareialaryn jetkizgen. «ASPMK-519» Holdingtik kompaniiasy óz qyzmetinde Shyǵys Qazaqstanda óndirilgen tsement ónimin paidalanýda. Sondai-aq bul kompaniia «Qazaqmys» AQ men «Qaztsink» JShS, irgeli nysan Úlbi metallýrgiialyq zaýyty men ózge de kásiporyndardyń elektr júieleriniń qurylysyn júrgizý men aralyq stantsiialar ornatý kezinde tolyq jiyntyqtalǵan elektr-tehnikalyq qurylǵylarmen qamtamasyz etýdi júzege asyrady. Budan ózge de mysaldar jetkilikti.
Sonymen qatar Marjan Muratqyzy Almaty oblysynda shyǵarylǵan ónimderdiń álemniń 41 memleketine jetkiziletindigin, oblysta 700 kásiporynnyń bar ekenin, sonyń ishinde 20-dan astamy transulttyq kompaniialar ekenin jáne de ótken jylda óńirge tartylǵan investitsiia kóleminiń mólsheri 528 mlrd. teńgeni quraǵandyǵyn atap ótti.
Osydan keiin ónerkásipti órkendetý, biznesti damytýdyń keleshegi jáne eki óńirdiń osy baǵyttaǵy qarym-qatynasy týraly Shyǵys Qazaqstan oblysynyń kásipkerlik jáne indýstriialyq-innovatsiialyq damý basqarmasy basshysynyń mindetin atqarýshy M.Musapirbekov baiandap berdi.
Jiyndy Shyǵys Qazaqstan oblysynyń ákimi Danial Ahmetov qorytyndylady. Óńir ákimi jetisýlyqtardyń jyly lebizderi úshin alǵysyn aityp, ShQO-nyń Jambyl, Soltústik Qazaqstan jáne basqa da oblystarmen óńiraralyq áriptestigi jaqsy jolǵa qoiylǵandyǵyn, endi mine Almaty oblysymen de bailanys nyǵaia bastaǵanyn atap ótti. ShQO ákiminiń sózine súiensek, máselen, Almaty oblysynyń ortalyǵy Taldyqorǵandaǵy Oqýshylar saraiy men «Jastar» sport kesheniniń jumysy shyǵystyq áriptesterge unaǵandyǵyna bailanysty osy óńirde de osy tipti nysandar salý josparlanyp otyr. Sondai-aq Danial Ahmetov Alakól jaǵalaýyn damytýdaǵy Almaty oblysynyń qolǵa alǵan tájiribelerine de qyzyǵýshylyq tanytatyndyqtaryn bildire kele, oblystar ózara yntymaqtastyq pen áriptestik qarym-qatynastaryn damytý arqyly Memleket basshysynyń tapsyrmalaryn sapaly oryndaýǵa múmkindik alatyndyǵyn jáne ol úshin óńirlerdiń bir-birimen sońǵy jetistikterimen bólisip, tájiribe almasýy qajet ekendigin atap ótti.
Qos taraptyń kásiporyn basshylary eki jaqty 8 memorandýmǵa qol qoidy. Endi eki oblystyń kásiporyndary jalpy quny 20 mlrd. teńgeni quraityn kólemde bir-biriniń shyǵarǵan ónimderin satyp alyp, tutynatyn bolady.
Jalpy, Almaty oblysynyń kúnderi aiasynda shyǵystyq kórermenderge óńirdegi shyǵarmashylyq ujymdardyń «Jer jánnaty Jetisýdan altyn Altaiǵa» atty mazmundy kontserttik baǵdarlamasy men oblystyq kórkemsýret galereiasynyń qoryndaǵy qylqalam sheberleriniń úzdik týyndylary usynyldy. Almaty oblysynyń Óskemenge jasaǵan sapary barysynda delegatsiia músheleri iri óndiris oshaǵy sanalatyn Úlbi metallýrgiia zaýytyn, Olga Rypakova atyndaǵy jeńil atletika maneji men ońaltý ortalyǵyn, tabiǵi-landshafttyq qoryq-mýzeiin, etnosaiabaq pen Ertis ózeniniń jaǵalaýyn, sondai-aq qalanyń ózge de sáýleti erekshe ári biregei nysandardy aralady.
