Azamattarmyzdy kópten mazalap júrgen jer máselesi boiynsha da naqty jaýap retinde qazaqtyń jeri eshbir sheteldiktiń menshigine berilmeitini, eshqashan satylmaityny Prezidenttiń «Táýelsizdik bárinen qymbat» atty maqalasynda taǵy da rastaldy. QR Prezidentiniń janyndaǵy Qazaqstan strategiialyq zertteýler institýty áleýmettik-saiasi zertteýler bóliminiń jetekshi ǵylymi qyzmetkeri Mádina Bektenova osylai málim etti, dep habarlaidy QazAqparat.
«2021 jyly elimiz qasietti Táýelsizdiginiń 30 jyldyǵyna nyq qadam basty. Táýelsizdiktiń 30 jyldyǵy – bul halqymyzdyń mańdai terimen jetken jetistikteriniń rámizi, sonymen birge - jańa tarihi syn. Osy ýaqyt ishinde halyqtyń erkin sanasy qalyptasyp, egemen eldiń jańa da jasampaz urpaǵy ósti. Qazaqstan álemde mártebeli memleket retinde ornyqty. Árine, bul ýaqyt ishinde maqtanýǵa turatyn, memlekettigimizdi nyǵaityp, búkil álemge pash etýge laiyqty talai aýqymdy ister jasaldy. Degenmen, Táýelsizdik osy otyz jylmen shektelmeidi. Oǵan jetýdiń tarihy, qazaǵymyzdyń kórgen qasireti bir jaǵynda tursa, ekinshi jaǵynda eldigimizdi, egemendigimizdi saqtap, ony keleshek urpaq úshin nyǵaitý isiniń turǵany sózsiz», - deidi Mádina Bektenova.
Onyń aitýynsha, Memleket basshysy Qasym-Jomart Toqaev «Táýelsizdik bárinen qymbat» atty maqalasynda Táýelsizdiktiń qadiri men qundylyǵyn, ony saqtaýdaǵy baǵdar-belesterdi aiqyndap bergen.
«Prezident memleketimizdiń otyz jylda ótkergen belesterdi tizgindep, olardyń árqaisysy atqarǵan missiiasy turǵysynan ǵasyrdyń júgin arqalap turǵanyna nazar aýdardy. «Kóregen basshy eldi ósiredi» demekshi, Qazaqstannyń memleket bolyp, keregesiniń keńeiýi jolyndaǵy Elbasynyń dara kóshbasshylyǵynyń mańyzyna aiyryqsha toqtaldy.
Sonymen qatar Memleket basshysy sońǵy ýaqytta aýmaqtyq tutastyǵymyzǵa kúmán keltirip, tatý kórshilik qatynastarǵa syna qaqqysy keletin keibir shetel azamattarynyń arandatýshylyq is-áreketterine de jaýap bere otyryp, bizdiń ekijaqty kelisimdermen bekitilip, halyqaralyq deńgeide tanylǵan shekaramyzdyń bar ekenin basa aitty. Tipti, 2018 jyly Kaspii teńiziniń quqyqtyq mártebesi týraly konventsiiaǵa qol qoiylǵannan keiin qurlyqtaǵy ǵana emes, teńizdegi shekaramyz da birjola aiqyndalyp, túpkilikti sheshilgeni de belgili. Sondai-aq azamattarmyzdy kópten mazalap júrgen jer máselesi boiynsha da naqty jaýap retinde qazaqtyń jeri eshbir sheteldiktiń menshigine berilmeitini, eshqashan satylmaityny Prezidenttiń maqalasynda taǵy da rastaldy», - dedi Mádina Bektenova.
Onyń pikirinshe, birlikti el buzylmas, sondyqtan memleketimizdi birtutas dep bilýimiz jáne tanytýymyz qajet.
«Ol úshin aimaqtarymyzdy soltústik, ońtústik, batys, shyǵys dep bóle bermei, tarihi, mádeni mańyzdy ataýlardy engizý de mańyzdy. Árine, ony Memleket basshysy aitqandai, baiyppen, oilanyp júzege asyrý kerek.
Ár qazaq úshin atalarymyzdyń qany men teri tamǵan bir ýys topyraqtyń ózi – esebi joq bailyq. Alaida bul jerdi durys paidalaný, qadirin bilip qasterleý, shynaiy otansúigishtikti qalyptastyrý – kezek kúttirmeitin úlken jumys. Jahandaný men aqparattyq damý zamanynda eldiń jat jurttyń ideologiialyq yqpalyna tez ilesip ketýi beleń alýda. Ásirese jastar bul qaýiptiń aldynda turǵany anyq. Buǵan tótep berýdiń joly – jańa zamanǵa sai bilim men básekege qabilettilikti, artyqshylyqtardy boiǵa sińirýmen qatar, tamyrymyzdy, ulttyq bolmysymyzdy berik saqtaý kerek», - dedi Mádina Bektenova.
Jetekshi ǵylymi qyzmetkerdiń aitýynsha, aldaǵy tórtinshi onjyldyqtyń bizge júkteitin mindeti – qýatty eldiń iesi jáne kemel halyq bolý. Bul jolda saiasi-ekonomikalyq reformalardy jáne sanany jańǵyrtý úderisin jalǵastyryp, zaman talabyna beiimdelgen ulttyń jańa bolmysyn qalyptastyrýymyz qajet.
«Ulttyń jańa bolmysy ótkendi bilýden, dáripteýden bastalady. Táýelsizdik qundylyǵy halqymyzdyń jadynda máńgi saqtalýy úshin óskeleń urpaq onyń qadirin bilýi kerek. Bul rette, tarihi jadynyń orny erekshe. Táýelsizdigimizdiń 30-jyldyǵymen qatar, bul egemendikke jetkizgen qaiǵy-qasiretke toly tarihi oqiǵalardy umytpaǵan jón. Milliondaǵan adamdy qazaǵa ushyratyp, tiri qalǵanyn jan saýǵalap bosyp ketýge májbúr etken alapat asharshylyqtyń alǵashqy kezeńi – 1921-1922 jyldardaǵy náýbetten beri 100 jyl ótti. 1986 jyly ul-qyzdarymyzdy Sovet odaǵynyń qaharynan qaimyqpai, ult namysy úshin alańǵa shyǵarǵan Jeltoqsan oqiǵasyna da 35 jyl tolady. Bunyń bári bizdiń tarih. Memlekettiligimiz týraly tis jaryp otyrǵandardyń aýzyna qum quiý úshin myńdaǵan ǵasyrlarǵa sozylǵan tarihymyzdyń, álemniń jartysyna ie bolǵan alyp memlekettik qurylystyń, azattyq úshin soǵystardyń, batyrlar jyrlaryn, Alash qozǵalysynyń baǵdarlamalaryn, jalpy ult shejiresin jappai qaita qarap, ony óz elimizben qatar búkil álemge jańa aqparattyq tetikter arqyly pash etý – mańyzdy mindet», - deidi jetekshi ǵylymi qyzmetkeri.
Sonymen qatar, tamyrymyzdy, ulttyq bolmysymyzdy berik saqtaý kerek», - dedi Mádina Bektenova el birliginiń, ult namysynyń ajyramas bóligi – ol til ekenin atap ótti.
«Memleket basshysy qazaq tiliniń mártebesin erekshe aityp, memlekettik tildi kópshiliktiń úirenýi jónindegi óz úndeýin naqty jetkizdi. Memlekettik tildi bilý - ár azamat úshin paryz. Ol úshin elde barlyq jaǵdai jasalýda, qalǵany ár adamnyń óz nietinde. Niettiń durys bolýy qazaq tilin meńgergisi keletin adamdarǵa da, osy maqsatqa jetýge jaǵdai jasaityn Úkimetke de bailanysty.
Qazaqstannyń asqaq bolashaǵy úshin eldik saiasat, jasampaz patriotizm, memlekettiń igiligi úshin kúndelikti eńbek pen ult birligi óte mańyzdy», - dedi ol.
