Oblys ákimi Berdibek Saparbaevtyń tóraǵalyǵymen ótken keńeste jer qoinaýyn paidalanýshylardyń kelisimsharttyq mindettemelerdi oryndaý jaiy qaraldy, dep habarlaidy "Ult aqparat".
Aǵymdaǵy jyldyń 1 naýryzyndaǵy jaǵdaiǵa sáikes, oblysta 319 jer qoinaýyn paidalaný nysany tirkelgen. Onyń ishinde barlaý jáne óndirýge arnalyp 200 kelisimshart jasalǵan desek, 109 litsenziia jáne jol qurylysyn salýǵa arnalǵan 9 jeńildetilgen ruqsat berilgen.
Iri jer qoinaýyn paidalanýshylar qatarynda «EýroHim Ýdobreniia», «Monterro Qazaqstan», «Qazaqsoda», «Jambylgips» jáne taǵy da basqa kompaniialar bar.
Oblystyq tabiǵi resýrstar jáne tabiǵat paidalanýdy retteý basqarmasynyń basshysy Aslan Orazbekov ótken jyl boiynsha ázirge naqty qorytyndy aqparat joq ekenin, sondyqtan 2019 jylǵy málimetterdi negizge alýyna týra keletinin tilge tiek etti. Onyń aitýynsha, 2019 jyly investitsiialardyń jalpy kólemi 63,2 milliard teńgeni, al salyq túsimderi 9,8 milliard teńgeni qurap, mamandardy oqytý jáne qaita daiarlaýǵa 207 million teńge baǵyttalǵan.
Atalǵan basqarmamen anyqtalǵan buzýshylyqtardy joiý týraly tiisti orynǵa 59 habarlama joldanǵan desek, 11 shart buzylyp, onyń 10-ynda kenishterdi qalpyna keltirý jumystary oryndalǵan. Oblys aýmaǵynda taǵy 17 kásiporyn tirkelip, jergilikti biýdjetke salyq tólemderin aýdara bastady.
«Óńirdiń ekonomikasy men onyń turǵyndarynyń ál-aýqaty jer qoinaýyn sapaly paidalanýǵa da bailanysty. Negizgi másele – jer qoinaýyn paidalanýshylardyń kelisimsharttyq mindettemelerin oryndaýy. Buǵan kompaniialardyń qyzmet etetin orny boiynsha tirkelýi, investitsiialar salý, jergilikti kadrlardy daiarlaý jáne áleýmettik tólemder jatady. Búginde atalǵan sharttardyń oryndalýyna qatysty baqylaý álsiz júrgizilýde», - dep atap ótti Berdibek Saparbaev.
Ekologiia departamentiniń basshysy Marat Qurmanbaev mysal retinde Jambyl aýdanynyń jer qoinaýyn paidalanýshylardyń belgilengen kelisimsharttyq aimaqtyń shekarasyn buzý jáne aýyl sharýashylyǵy jerlerinde óz betinshe paidaly qazbalardy óndirýge qatysty túrli faktilerdi alǵa tartty.
Budan soń oblys ákimi beinebailanys arqyly keibir iri kásiporyndardyń jai-kúiine nazar aýdardy. Aitalyq, «Monterra Qazaqstan» altyn óndirýshi kompaniiasy investitsiialar kólemin 832 milliard teńgege deiin ulǵaitpaq, ol jaqyn arada jer barlaý jumystaryn bastaýǵa nietti. Berdibek Saparbaev taý-ken baiytý kombinatynyń qurylysyn jedeldetip, altyn kenderin igere bastaýǵa shaqyrdy. Jergilikti biliktiń kómegimen «Qazsoda» JShS qajettiligi úshin jer bólý máselesi de óz sheshimin tapty.
«Bizdiń jerimizdiń qoinaýy halyqtyń igiligine qyzmet etýi tiis. Sizder biznestiń áleýmettik baǵytyn umytpaý kereksizder. Barlyq kelisimsharttyq mindettemeler saqtalýy qajet. Ákimder men tiisti qurylymdar tarapynan qatań baqylaý ornatý kerek. Geologiialyq barlaý jumystarynyń aýqymyn keńeitý qajettiligi týyndaýda. Quqyq qorǵaý organdaryna jer qoinaýyn zańsyz paidalanýǵa baqylaýdy kúsheitý boiynsha tapsyrma berildi. Ásirese, Moiynqum aýdanynda óz betterinshe tehnikalarmen jumys isteitinder az emes, al aýdan ákimi olardan múlde habarsyz. Búgingidei pandemiia men ekonomikalyq qiyndyqtar kezeńinde jumysshylar jalaqyny ýaqytyly jáne tolyq kólemde alýy tiis. Jalaqynyń jyl saiynǵy ósimi kem degende 10-15 paiyzdy qurap otyrýy kerek», - dep túiindedi Berdibek Saparbaev.
