Biyl jer qoinaýyn paidalanýshylardyń satyp alý jospary 6,8 trln teńge bolsa, sonyń 46,5%-yn jergilikti kásiporyndarǵa berý kózdelgen, dep habarlaidy QazAqparat.
Bul týraly QR Energetika ministri Maǵzum Myrzaǵaliev Úkimet otyrysynda málim etti.
«2020 jyldyń qorytyndysy boiynsha kómirsýtek shikizaty jáne ýran óndirý salasyndaǵy jer qoinaýyn paidalanýshylardyń taýarlardy, jumystar men kórsetiletin qyzmetterdi satyp alýynyń jalpy kólemi shamamen 5,4 trln teńgeni qurady. Bul rette osy satyp alýlardaǵy jergilikti qamtý úlesi 46% boldy.
Onyń ishinde taýarlardy satyp alýdaǵy jergilikti qamtý 19,7% qurasa, jumystardy satyp alý kórsetkishi 51,3%-ǵa teń. Qyzmetterdi satyp alýda jergilikti qamtý deńgeii 50,3%-dy qurady», - dedi ministr.
Onyń sózine qaraǵanda, jer qoinaýyn paidalanýshylar 2021 jyly 6,8 trln teńgeniń taýary men, qyzmetterin satyp alýdy josparlaǵan.
«Mundaǵy jergilikti qamtý úlesiniń boljamdy kórsetkishi – 46,5% nemese 3,1 trln teńge. Taýarlar boiynsha jergilikti qamtýdyń úlesi 19,5%, al jumystar boiynsha 51,3% bolady dep kútilýde. Qyzmetterdi satyp alýdaǵy jergilikti qamtý 52,3% kórsetkishinde boljanady.
Taýarlardy, jumystar men kórsetiletin qyzmetterdi satyp alý kóleminiń shamamen 77%-y úsh iri operatorǵa tiesili. Olar – «Teńizshevroil» JShS, «Qarashyǵanaq Petroleým Opereiting B.V.» jáne «Nort Kaspian Opereiting N.V.». Satyp alýdyń qalǵan 13%-y «Samuryq-Qazyna» kompaniialar tobynyń jáne 10%-y basqa da jer qoinaýyn paidalanýshylardyń úlesinde», - dedi Maǵzum Myrzaǵaliev.
