Qoǵam belsendisi Muhtar Taijan Májiliste «QR keibir zańnamalyq aktilerine jer qatynastary máseleleri boiynsha ózgerister men tolyqtyrý engizý týraly» zań jobasyna óz usynymdaryn aitty, dep habarlaidy QazAqparat.
«Biz Prezidenttiń aýyl sharýashylyǵy jerlerin sheteldikterge satýǵa jáne jalǵa berýge tyiym salý týraly tapsyrmasyn oryndaýymyz kerek. Ol úshin men zańda bylai jazýdy usynamyn: Jer QR rezidentterine, iaǵni jeke tulǵalar men zańdy tulǵalarǵa beriledi. Quryltaishylar men qatysýshylar quramynda da jeke tulǵalar QR azamattary bolýy kerek. Bul usynysty aitqan sebebim, kez kelgen notariýs qandai da bir JShS quramyndaǵy jeke tulǵalardyń QR azamattary ekenin kórgende, mámilelerdi rásimdeý ońai bolady. Al JShS men zańdy tulǵalardy tekserý múmkin emes, olardyń quramyndaǵy sheteldikterdiń úlesi bar ma, joq pa?», - dedi M. Taijan Májiliste zań jobasy jumys tobynyń otyrysynda.
Onyń aitýynsha, sheteldikterge, sheteldik zańdy tulǵalarǵa jerdi satýǵa jáne jalǵa berýge tyiym salý úshin jer kadastryn ashý qajet.
«Jer kadastryn ashpasaq, bul maqsatqa qol jetkize almaimyz. Iaǵni, memleket menshigi bolyp sanalatyn aýyl sharýashylyǵy jerlerin kim jaldap otyrǵanyn kórýimiz kerek. Bul aqparattar ashyq bolýǵa tiis jáne «Jeke derekter týraly» zań esh buzylmaidy, sebebi aýyl sharýashylyǵy jerleriniń 99 paiyzdan astamy – memleket menshigi. Jalǵa alýshylardyń aty nemese zańdy tulǵalar ataýy ashyq bola alady», - dedi M. Taijan.
Sonymen birge, spiker Qazaqstan azamattyǵyn alý talaptaryn kúsheitýdi usyndy.
«Álemdik tájiribege súienetin bolsaq, qandai da bir eldiń azamattyǵyn alý úshin adamdar eń kemi 5 jyl turýy kerek, sol eldiń tili men tarihy boiynsha synaq tapsyrýy kerek. Iaǵni, osy elge niettestigin bildirýi kerek jáne el ishinde zańbuzýshylyqtar jasamaýy kerek», - dedi Muhtar Taijan.
