Jer astyna túsip ketken júk kóligi Medeý aýdanynyń turǵyndaryn jylýsyz qaldyrdy, dep habarlaidy "Ult aqparat".
Aldyn ala málimet boiynsha, saǵat 13.00 shamasynda qum-qiyrshyqtas qospasy tielgen salmaǵy 27 tonna KamAZ páterlerdiń jylý kamerasy ornalasqan aýmaqqa kirgen.
Júk tielgen kólik salmaǵyna eseptelmegen betki qabattaǵy tóseme shydas bermei, opyrylyp tústi. Saldarynan birneshe turǵyn úi jylýsyz qaldy.
«Diametri 500 mm qubyrǵa zaqym kelýine bailanysty 336 kópqabatty turǵyn úidi, 86 jeke turǵyn úidi, 9 densaýlyq saqtaý nysanyn, 10 balabaqsha men 6 bilim nysanyn jylý jelisinen ýaqytsha ajyratýǵa týra keldi» dep habarlady «Almaty jylý jelileri» JShS.
«Almaty jylý jelileri» JShS jóndeý brigadalary júrgizip jatqan apatty qalpyna keltirý jumysyna 18 maman men mamandandyrylǵan 4 tehnika jumyldyryldy.
Jylý men ystyq sý búgin saǵat 23.00-ge deiin qaita qosylady.
Qazirgi ýaqytta Almaty qalasy Medeý aýdanynyń aýmaǵyndaǵy Qazybaev-Nazarbaev-Dostyq-Taimanov kósheleriniń aýmaǵynda ornalasqan turǵyn úiler men basqa ǵimarattar ýaqytsha ystyq sý men jylýdan ajyratyldy.
«Injenerler jylý magistrali segmentiniń zaqymdanýy basqa tutynýshylarǵa jetkiziletin jylý energiiasynyń parametrlerine jáne belgilengen sektorda ornalasqan ǵimarattardaǵy temperatýra rejimine áser etpeidi» delingen habarlamada.
