Sýret: akorda.kz
Qazaqstandaǵy 37 jylý elektr ortalyǵynyń ortasha paidalaný merzimi - 61 jyl. Bul týraly Energetika ministri Bolat Aqsholaqov málimdedi, dep habarlaidy Sputnik Qazaqstan portaly.
Arnaiy komissiia eldegi jylý elektr ortalyqtarynyń tehnikalyq jai-kúiine taldaý júrgizdi.
"Jylý elektr ortalyǵynyń ortasha paidalaný merzimi – 61 jyl. Olardyń shamamen 76%-i 50 jyldan astam jumys isteidi", - deidi Aqsholaqov Úkimet otyrysynda.
Ministrdiń aitýynsha, JEO-daǵy taǵy bir problema – jalaqynyń tómen bolýyna bailanysty kadr jetispeýshiligi.
"Qazaqstandaǵy jylý elektr ortalyǵy óndiristik personalynyń ortasha jalaqysy 2021 jyly 224 100 teńgeni qurady. Ózderińiz biletindei, jylý elektr ortalyǵynda shyǵyndar jylý jáne elektr energiiasy boiynsha bólinedi. Jylý elektr ortalyqtarynda jylý energiiasy tarifteri esebinen eńbekaqy tóleý qory jyl saiyn 5%-ke ósedi. Energetika ministrligi elektr energiiasyna shekti tarifti qaraý kezinde elektr energiiasyn óndirýge tartylǵan personal úshin jalaqynyń 15% ósýin kózdedi", - dedi vedomstvo basshysy.
Sondai-aq taldaý nátijesi boiynsha elektr stantsiialarynda avariialyq ajyratý 5%-ǵa óskeni anyqtalǵan.
Buǵan deiin ministr elimizdegi 37 jylý elektr ortalyǵynyń tehnikalyq jai-kúiine taldaý júrgizilgenin málimdedi. Onyń qorytyndysy boiynsha jylý elektr ortalyqtarynyń jartysy – 19 JEO "qyzyl" aimaqta tur. Olarǵa kúrdeli jóndeý qajet.
