Qaraǵandy oblysynyń ákimi Jeńis Qasymbek «ArsellorMittal Temirtaý» basshylyǵyn ekologiiany jaqsartý jónindegi jospardyń oryndalýyn jedeldetýge shaqyrdy. Kásiporynnyń shyǵaryndylary qarqynyn tómendetý máselesi Temirtaýda ótken «jasyl keńeste» talqylandy, dep habarlaidy "Ult aqparat".
«EkoMurajai» mamandary júrgizgen kartografiialyq zertteýler «ArsellorMittal» Temirtaýdaǵy lastanýdyń basty kózi bolyp tabylatynyn rastaidy. Sarapshylardyń qorytyndylary jerserigi arqyly jasalǵan túsirilimderge, aýany taldaýǵa jáne esepteýlerge negizdelgen. Metallýrgiialyq kombinat ornalasqan Shyǵys ónerkásip aimaǵy aýdanynda ekologtar aýadaǵy qara metallýrgiiaǵa tán, shyǵaryndylardyń kózderinde alynǵan úlgilermen sáikes keletin zattardy anyqtady.
Bul jaǵdaidy túzetý úshin 2019 jyly Temirtaýda ekologiialyq jaǵdaidy jaqsartý jónindegi jospar ázirlendi. Ol óndiristi jańǵyrtýdy, onyń tabiǵi gazǵa ishinara kóshýin, sondai-aq qalany kógaldandyrýdy qamtidy. Kásiporyn QR ekologiia, geologiia jáne tabiǵi resýrstar ministrligimen memorandýmǵa qol qoidy. Qujatqa sáikes, AMT atmosferaǵa ziiandy zattardyń shyǵarylýyn 2024 jylǵa deiin 30%-ǵa azaitýy tiis.
«Biz AMT-da ekologiiany jaqsartý jónindegi nietter bar ekenin kórip otyrmyz. Olar tiisti qujattarǵa, memorandýmǵa qol qoidy. Biz atalmysh jobanyń iske asyrylýy qandai satyda ekenin bilgimiz keledi. Jyl sońyna deiin ne bolatynyn, kelesi jyly ne kútý kerektigin bilý qajet. Jáne biz ziiandy shyǵaryndylardyń naqty qanshalyqty azaiǵanyn kórgimiz keledi. Temirtaýdyń ekologiialyq jaǵdaiy osy kásiporynnyń jumysyna bailanysty», - dedi Jeńis Qasymbek.
Qazir «ArsellorMittal» JEO-BAÚS jáne JEO-2 Qazandyq jabdyqtaryn qaita jańǵyrtý jumystary júrgizilýde. Bul shyǵaryndylardy 36 myń tonnaǵa qysqartýǵa múmkindik beredi. Sonymen qatar gaz shyǵarý jolyn qaita qurý jáne 500 myń aǵash otyrǵyzý josparlanýda.
«Bizdiń kompaniia ekologiia máselelerine erekshe kóńil bóledi. Biz barlyq múddeli taraptarmen turaqty negizde ózara is-qimyl jasaityn bolamyz. Qazir kóptegen jobalar engizý satysynda. Olardyń iske asyrylýymen ekologiialyq jaǵdai aitarlyqtai jaqsarady. Biraq buǵan qol jetkizý úshin biz barlyǵymyz ortaq komanda retinde jumys isteýimiz kerek jáne árqaisysymyz óz jaýapkershiligimizdi túsinýimiz kerek», - dedi «ArselorMittal Temirtaý» AQ Bas direktory Bidjý Nair.
Kezdesý sońynda óńir basshysy kásiporyn basshylyǵyn jumys qarqynyn jedeldetýge jáne ideialarmen almasý úshin ekologtarmen yntymaqtasýǵa shaqyrdy.
