JRK jobasynyń qurylysyn aiaqtaý máselesi Elordany damytý jónindegi memlekettik komissiianyń otyrysynda qaralady. Bul týraly QR Premer-Ministriniń orynbasary Jeńis Qasymbek 2019 jylǵy 15 shildedegi Úkimettiń keńeitilgen otyrysynda Memleket basshysynyń bergen tapsyrmalaryn oryndaý jónindegi QR Úkimetiniń otyrysynyń qorytyndysy boiynsha ótken baspasóz konferentsiiasy kezinde málimdedi, dep habarlaidy "Ult aqparat".
J. Qasymbek Nur-Sultan qalasynda jeńil relsti kólik jobasyn (JRK) aiaqtaý máselesi 25 shildede ótetin Elordany damytý jónindegi memlekettik komissiianyń otyrysynda talqylanatynyn aitty.
«Nur-Sultan qalasynda JRK júiesin salý jobasy shynymen de uzaqqa sozylyp ketti jáne birinshi jyl salynyp jatqan joq. Másele mynada, JRK qurylysyna bólingen qaryzdyń birinshi transhynyń qarajaty taratylǵan Astana Bankinde boldy. Búginde elorda ákimdigi, QR Ulttyq banki jáne QR Qarjy ministrligi atalǵan qarajatty óndirip alý boiynsha is-sharalar júrgizýde», — dedi J. Qasymbek.
80 mlrd astam teńge qarjy ustaldy, sondyqtan JRK qurylysy ýaqytsha toqtatyldy.
«Bizde bul jobany aiaqtaý týraly Prezidenttiń tapsyrmasy bar, ákimdik osy jobany júzege asyrýdyń túrli nusqalary men tetikterin usynady. Biz jobany aiaqtaý merzimin shamamen 2020 jyldyń sońyna qarai dep qarastyryp jatyrmyz», — dedi J. Qasymbek.
Onyń aitýynsha, sarapshylar JRK qurylysy Nur-Sultan qalasyndaǵy kólik qozǵalysyn aitarlyqtai jeńildetetinine sendiredi.
Búgingi tańda qalada 400 myńnan astam avtokólik bar jáne kúnine 700 myńnan astam jolaýshy tasymaldanady.
Sonymen qatar, vitse-premer Túrkistan oblysynyń Arys qalasyn qalpyna keltirý qarqyny týraly aityp ótti.
«Búginde Arys qalasyn qalpyna keltirý úshin barlyq kúshter jumyldyrylýda: 250-den astam qurylys kompaniialary jumys jasap jatyr, arnaiy tehniika tartylǵan, Úkimet qorynan, Túrkistan jáne basqa oblystar men respýblikalyq mańyzy bar qalalardyń qorlarynan qajetti qarajat bólinip otyr», — dedi J. Qasymbek, aitarlyqtai kómekti iri kompaniialar men basqa da biznes-qaýymdastyq ókilderi kórsetip jatqanyn aityp.
Qazirgi tańda Arysta 10 myńnan astam jumysshy úiler men áleýmettik nysandardy qalpyna keltirý jumystarymen ainalysýda, qurylys jumystarynyń sapasyna erekshe kóńil bólinýde. Barlyq jumystardy belgilengen merzimde aiaqtaý josparlanǵan.
Turǵyn úilerden basqa, biznes nysandary, áleýmettik nysandar: aýrýhanalar, mektepter, balabaqshalar, joldar jáne basqa qalalyq infraqurylym qalpyna keltirilip, jóndeledi.
