Ujymdarda jemqorlyqty joiý jáne aldyn alý jumystary is júzinde júrgizilýi tiis. Bul týraly QR Sybailas jemqorlyqqa qarsy is-qimyl agenttiginiń tóraǵasy Alik Shpekbaevtyń BQO-ǵa jumys sapary kezinde aityldy, dep habarlaidy "Ult aqparat".
Agenttik tóraǵasynyń eki kúndik jumys sapary Bórli aýdanynan bastalyp, ol osynda servistik ákimdik jumysymen tanysty.
Ákimdikke jyl basynan beri 1200 áleýmettik qyzmet alýǵa myńǵa jýyq azamat ótinish bildirdi, onyń 800-i onlain túrde berildi.
Alik Shpekbaev bir mezgilde 300 adamdy qabyldai alatyn jáne sporttyń 19 túri boiynsha jattyǵatyn «Qarashyǵanaq» sport keshenine bardy. Meimannyń aitýynsha, sport kesheninde oqýshylar úshin barlyq jaǵdai jasalǵan, sondyqtan sportshylarǵa jaily jer izdep, basqa qalalarǵa ketýdiń qajeti joq.
Agenttik tóraǵasy «Qarashyǵanaq Petroleým Opereiting B.V.» kompaniiasyn aralaý barysynda óndirýshi salalardaǵy jemqorlyqtyń aldyn alýdyń strategiialyq mańyzdylyǵyn atap ótip, korporativtik komplaens-qyzmeti jumysynyń nátijelerimen tanysty.
«Memleket basshysynyń saiasi erik-jigeriniń arqasynda biz kvazimemlekettik sektorda ǵana emes, jeke korporativtik sektorda da sybailas jemqorlyqqa qarsy tiimdi komplaensti engizý úshin senimdi quqyqtyq negiz qaladyq. Integrity ideologiiasyn nasihattaý dál osyndai iri salalyq kompaniialardan bastalýy tiis. Kásipkerler tazalyq pen parasattylyq standarttaryn saqtaýǵa neǵurlym kóp kóńil bólse, soǵurlym tezirek básekege qabilettilikke qol jetkizemiz», - dedi A.Shpekbaev.
Biylǵy 17 qazannan bastap kvazimemlekettik sektor uiymdarynda parasattylyqtyń korporativtik standarttaryn saqtaýǵa jaýapty jemqorlyqqa qarsy komplaens-qyzmetter institýty zańnamalyq deńgeide engizilgen bolatyn.
Sondai-aq Sybailas jemqorlyqqa qarsy qyzmet basshysy basshylardyń óz ujymdarynda jemqorlyqty joiý jáne onyń aldyn alýmen ainalysý mindeti qur sóz emes, is júzinde bolýy kerektigin basa aitty.
Kórshiles Shyńǵyrlaý aýdanynda agenttiktiń jumys toby men qoǵam qairatkerleri jańa servistik ákimdik ashty. Onda turǵyndardyń jaily jaǵdaiyn arttyrýǵa septigin tigizetin 54 túrli memlekettik qyzmet kórsetiletin bolady. Aýdan mektepteriniń birinde «e-Ashana» tsifrlyq jobasyn júzege asyrý týraly bastama kótergen «Adal urpaq» klýbynyń qyzmeti tanystyryldy.
Agenttik tóraǵasy memlekettik kirister basqarmasyna baryp, Shyńǵyrlaý aýdanynyń aktivimen, jurtshylyǵymen jáne biznes qaýymdastyǵy ókilderimen kezdesti.
Ol jergilikti biýdjetterdiń ońtaily jumsalýyna baqylaýdy kúsheitý qajettigin atai otyryp: «Agenttik «Ashyq biýdjetterdiń interaktivti kartasy» negizinde «Ashyq biýdjet» biregei jobasyn iske asyrýda. Ol qoǵamdyq baqylaýǵa jáne azamattardyń qarjylyq saýattylyǵyn arttyrýǵa jańa serpin beredi. Ony iske asyrýmen agenttiktiń aýmaqtyq departamentteriniń qyzmetkerlerinen, «Adaldyq alańy» jobalyq keńseleriniń múshelerinen jáne azamattyq qoǵam institýttarynyń ókilderinen turatyn arnaiy jumys toby ainalysady. Sondyqtan jurtshylyqty jemqorlyqqa qarsy tehnologiialardyń zamanaýi quraldaryn belsendi qoldanýǵa shaqyramyn», - dedi.
Alik Shpekbaev Shyyńǵyrlaý aýdanynda «Adaldyq alańy» respýblikalyq jobalyq keńsesiniń basshysy Tólegen Baiǵulovpen jáne «Adal kómek» jobasynyń jetekshisi Aiman Omarovamen birge «Halyq úni» jobasy aiasynda azamattardy qabyldady.
