Jemqorlyq pen uiymdasqan qylmysty zertteý ortalyǵy (OCCRP) Reseide jumysyn toqtatty. Uiym resmi saitynda Resei biliginiń táýelsiz jýrnalistikaǵa qarsy kampaniiasy údegen shaqta jýrnalisterdi qorǵaý úshin osyndai qadamǵa barǵanyn jazǵan, dep habarlaidy Azattyq.
"Bul budan ári qarai eldegi jemqorlyqty jazbaimyz degendi bildirmeidi. Úkimet óz azamattaryn bizben áriptestik ornatqany úshin jazalaitynyn jaqsy bilemiz" dedi uiymnyń negizin qalaýshylardyń biri, OCCRP bas redaktory Driý Sallivan.
Onyń aitýynsha, qazir Reseidegi áriptesteriniń basym bóligi "shetel agenti" nemese "jumysyn doǵarýy tiis" uiym retinde tanylǵan. Ol OCCRP-dyń Reseidegi qyzmetkerlerine ózge elderge kóshýge keńes bergen. Bas tartqandarǵa qosymsha aqy tólep, jańa jumys tabýyna kómektesken.
Jemqorlyq pen uiymdasqan qylmysty zertteý ortalyǵy (OCCRP) – álemde 50-den astam táýelsiz BAQ-tyń basyn biriktirgen jáne jylyna júzden astam zertteý jariialaityn kommertsiialyq emes uiym.
Reseide qazir 25 jýrnalist pen 18 BAQ "shetel agenti" retinde tanylǵan. Keiingi jarty jylda "shetel agenti" retinde tanylǵan BAQ-tyń qataryna "Vajnye istorii", The Insider, VTimes.io, "Medýza", "Pervoe antikorrýptsionnoe SMI", "Dojd" telearnasy engen.
