Jemqorlyq daýyna ilikken Mádeniet jáne sport ministriniń burynǵy orynbasary Sáken Musaibekov memleketke 62 mln teńgeden astam aiyppul tóleitin boldy, dep habarlaidy "Ult aqparat".
Almatydaǵy Túrksib aýdandyq soty Mádeniet jáne sport ministriniń burynǵy orynbasary Sáken Musaibekovke qatysty úkim shyǵardy. Sot qorytyndysy boiynsha burynǵy vitse-ministr alaiaqtyǵy úshin kináli dep tanyldy.
Sáken Musaibekov Qylmystyq kodekstiń 190-baby 3-bóliginiń 1-tarmaǵy boiynsha iri kólemde alaiaqtyq jasady dep aiyptalǵan bolatyn.
«Sot onyń Mádeniet jáne sport vitse-ministri retinde 2021 jylǵy 18-21 aqpan aralyǵynda aýyr sybailas jemqorlyq qylmys jasaǵanyn anyqtady. Musaibekov pen Almaty qalasy prokýrorynyń orynbasary arasyndaǵy kináni moiyndaý týraly protsessýaldyq kelisim boiynsha prokýror sottan Musaibekovke para somasynyń on ese mólsherinde - 62 394 00 teńge aiyppul túrinde jaza taǵaiyndaý týraly ótinish jasady», - dep túsindirdi Túrksib aýdandyq soty.
Sot eks-sheneýnikti kináli dep tanyp, prokýrordyń talabyn qanaǵattandyrdy.
«Jaza taǵaiyndaý kezinde sot kináni moiyndaý týraly jasalǵan protsessýaldyq kelisim boiynsha Musaibekovke urlanǵan múliktiń on eselengen mólsherinde aiyppul salý túrindegi jazany taǵaiyndaý múmkin ekeni týraly qorytyndyǵa keldi. Sot Sáken Musaibekov jasaǵan qylmystyq quqyq buzýshylyqtyń qoǵamdyq qaýiptilik dárejesin, qylmystyq jaýaptylyq pen jazany jeńildetetin mán-jailardy, taǵaiyndalǵan jazanyń ony túzeýge jáne onyń ómir súrý jáne otbasy jaǵdailaryna áserin nazarǵa aldy. Úkim zańdy kúshine endi», - delingen sottyń resmi málimetinde.
Eske salsaq, aqpan aiynyń aiaǵynda Mádeniet jáne sport vitse-ministri bolǵan Sáken Musaibekov qyzmettik laýazymyn paidalanyp, býkmekerlik salanyń múddesin qorǵady degen kúdikke ilingen bolatyn.
