QR Memlekettik qyzmet isteri agenttigi saiasi qyzmetshiler men memlekettik organdardyń birinshi basshylarynyń baǵynyshty qyzmetshileriniń jemqorlyq qylmystary úshin jaýapkershiligi máselelerin túsindirdi, dep habarlaidy QazAqparat.
«Ortalyq memlekettik organnyń basshysy (ministrler, agenttikterdiń tóraǵalary, Prezidentke tikelei baǵynatyn jáne esep beretin memlekettik organdardyń tóraǵalary) óziniń orynbasary, ózine tikelei baǵynyshty memlekettik saiasi qyzmetshi, jaýapty hatshy, apparat basshysy ne ortalyq memlekettik organnyń oblystyq, respýblikalyq mańyzy bar qalanyń nemese astananyń aýmaqtyq bólimshesiniń basshysy sybailas jemqorlyq qylmys jasaǵan kezde otstavkaǵa beredi», - dedi QR MQIA Memlekettik qyzmet salasyndaǵy baqylaý departamentiniń direktory Erlan Saparov.
Onyń aitýynsha, ortalyq memlekettik organ basshylarynyń orynbasarlary ózi jetekshilik etetin vedomstvonyń, derbes qurylymdyq bólimsheniń basshysy sybailas jemqorlyq qylmys jasaǵan kezde jumystan shyǵýǵa ótinish beretin bolady.
Otstavkaǵa ketý týraly mindet ótken jyldyń 10 jeltoqsanynan keiin sybailas jemqorlyq qylmys jasaǵan qyzmetkerlerdiń basshylaryna jáne saiasi qyzmetkerlerge qoldanylady. Memlekettik saiasi qyzmetshiler, eger olar taǵaiyndalǵan kúnnen bastap úsh ai ótkennen keiin sybailas jemqorlyq qylmys jasalǵan jaǵdaida otstavkaǵa ketedi.
Saiasi qyzmetshiler sottyń aiyptaý úkimi zańdy kúshine engennen keiin nemese sot álde qylmystyq qýdalaý organy qylmystyq isti Qazaqstan Respýblikasy Qylmystyq is júrgizý kodeksiniń 35-baby birinshi bóliginiń 3), 4), 9), 10), 11) 12) jáne 12) tarmaqshalarynyń nemese 36-baby negizinde qysqartqan soń 10 kúntizbelik kún ishinde otstavkaǵa beredi.
Basshylardyń jaýapkershiligin qaraý kezinde kórsetilgen sharttardan basqa, qol astyndaǵylarǵa jasalǵan sybailas jemqorlyq qylmysy men basshynyń sybailas jemqorlyq quqyq buzýshylyq jasaýdyń aldyn alý jónindegi laýazymdyq mindetterin oryndamaýdaǵy nemese tiisinshe oryndamaýdaǵy kinási arasynda bailanystyń bolýy da mańyzdy.
